SSV Germaniya bilan qanday kelishuvlarga erishilganini ma’lum qildi

Sog‘liqni saqlash vazirligi Germaniya kompaniyalari bilan erishilgan kelishuvlar yuzasidan ma’lumotni taqdim etdi.

Unga ko‘ra, 26—27-may kunlari Samarqand shahrida bo‘lib o‘tgan O‘zbekiston—Germaniya xalqaro sog‘liqni saqlash forumida nemis kompaniyalari va tibbiyot muassasalari bilan umumiy qiymati 100 million AQSH dollaridan ortiq 70 dan ziyod kelishuv hamda memorandumlar imzolandi. Ushbu hamkorlik Respublika ixtisoslashtirilgan travmatologiya va ortopediya ilmiy-amaliy tibbiyot markazida qo‘llanilayotgan innovatsion amaliyotlar soni ortishiga xizmat qilishi kutilmoqda.

Yil oxirigacha mazkur markazda kompyuter navigatsiyasi yordamida yirik bo‘g‘imlarni endoprotezlash va robotlashtirilgan jarrohlik texnikasini joriy etish rejalashtirilgan. Ayni maqsadda tibbiy robot uskunalari ishlab chiqaruvchi qator kompaniyalar bilan muzokaralar olib borilyapti.

Qayd etilishicha, Samarqandda o‘tkazilgan xalqaro forum bu vazifa ijrosini jadallashtirish imkonini berdi. Anjuman doirasida dastavval Germaniyaning Minden shahrida joylashgan Boxum universiteti qoshidagi Yoxannes Vesling klinikasi yetakchi mutaxassislari Respublika ixtisoslashtirilgan travmatologiya va ortopediya ilmiy-amaliy tibbiyot markaziga kelib, o‘z ilg‘or tajribalari bilan o‘rtoqlashdi.

Xususan, klinika professorlari Yoxannes Sayxen, Evald Xyoring va Xarald Kistmaxer ishtirokida tizza bo‘g‘imini unikondulyar endoprotezlash, chanoq-son bo‘g‘imini kalta oyoqchali endoprotezlar bilan hamda navigatsiya texnologiyasi yordamida endoprotezlash mavzulariga bag‘ishlangan workshop o‘tkazildi.

O‘z navbatida, nemis klinikasida muvaffaqiyatli qo‘llanilayotgan ana shu yuqori texnologik operatsiya usullarini o‘rganish va tatbiq etish muhokama qilindi. O‘zbekiston—Germaniya tibbiyot forumi davomida bu masala keng formatda ko‘rib chiqilib, Respublika ixtisoslashtirilgan travmatologiya va ortopediya ilmiy-amaliy tibbiyot markazi hamda Yoxannes Vesling klinikasining travmatologiya, ortopediya va endoprotezlash markazi o‘rtasida hamkorlik shartnomasi imzolandi.

Ushbu kelishuv o‘zaro tajriba almashish, malaka oshirish kurslari va mahorat darslari orqali mutaxassislar tayyorlash, tadqiqot hamda maslahatlashuvlar o‘tkazish imkonini beradi.