Toshkentda “O‘zbekistonda Germaniya iqtisodiyoti kuni”ga bag‘ishlab, O‘zbekiston—Germaniya o‘rtasidagi savdo-iqtisodiy, investitsiyaviy hamda sanoat kooperatsiyasini rivojlantirishga doir bir qator tadbirlar bo‘lib o‘tdi. Bu haqda Investitsiyalar, sanoat va savdo vazirligi matbuot xizmati xabar berdi.
Qayd etilishicha, konferensiyada Germaniya va O‘zbekiston biznes hamjamiyatining 300 dan ortiq vakillari, investorlar, shuningdek, O‘zbekiston vazirliklari va idoralari rahbarlari va mutaxassislari qatnashgan.
Anjuman ishtirokchilarining taʼkidlashicha, bu kabi yirik xalqaro tadbirlar ishbilarmonlik aloqalarini yanada kengaytirish, ikki tomonlama savdoni rivojlantirish, qo‘shma investitsiya loyihalari va tashabbuslarini ilgari surish istiqbollari va imkoniyatlarini aniqlash, umuman, har ikki mamlakat ishbilarmon doiralari o‘rtasidagi munosabatlarni mustahkamlashda muhim rol o‘ynaydi.
So‘nggi ikki yilda O‘zbekistonga kiritilgan Germaniya investitsiyalarining umumiy hajmi qariyb 2 milliard yevroni tashkil etdi. Shuningdek, hozirgi paytda Germaniya hamkorlari bilan birga qiymati 10 milliard dollardan ortiq bo‘lgan 100 dan ziyod qo‘shma loyihalar amalga oshirilmoqda.
So‘nggi 6 yilda O‘zbekistonda Germaniya kapitali ishtirokida tashkil etilgan korxonalar soni qariyb 3 barobar o‘sib, bugungi kunda bu ko‘rsatkich 200 taga yetdi. 2023-yilning 6 oyi davomida 17 ta qo‘shma korxona ishga tushirilgan.
Iyul oyida Germaniya O‘zbekiston va yana olti davlatga 20 million yevro ajratayotgani to‘g‘risida xabar berilgandi. May oyida bo‘lsa O‘zbekiston—Germaniya xalqaro sog‘liqni saqlash forumida nemis kompaniyalari va tibbiyot muassasalari bilan umumiy qiymati 100 million dollardan ortiq 70 dan ziyod kelishuv hamda memorandumlar imzolangan.
Izoh (0)