“Ўзбекистонда юқори малакали 5–7 минг нафар ҳайдовчига эҳтиёж бор” — халқаро автомобиль транспорти анжуманидан репортаж

Тошкент шаҳрида “Халқаро автомобиль транспорти: барқарор ривожланиш ва фаровонлик сари” мавзусида халқаро анжуман ташкил этилди, дея хабар бермоқда “Дарё” мухбири. Конференцияга 11 та халқаро ташкилот, 29 та мамлакатдан 93 та хорижий делегация вакиллари таклиф этилган.

Божхона қўмитаси бўлим бошлиғи Элёр Ҳакимовнинг айтишича, анжуман Ўзбекистон автомобиль транспорти соҳаси учун муҳим аҳамиятга эга.

“Анжумандан мақсад — дунёдаги автомобиль транспортида бўлаётган муаммоларни ҳал этиш, савдо ва транспорт ташувларини соддалаштириш масалаларини муҳокама қилишдан иборат. Халқаро автомобиль транспорти иттифоқи Женеванинг 1975 йилдаги ТИР конвенция си асосида амалга оширилади. ТИР—халқаро автомобиль ташувларини соддалаштирадиган, халқаро транспорт операторларига чегараларни кесиб ўтишда қулайликлар яратиб берадиган бир механизмдир. Бугунги кунда Ўзбекистон ушбу механизмни қўллашда дунёда иккинчи ўринда туради. Яъни мамалакатда географик жойлашувидан денгизга чиқиш имконияти йўқ. Шу сабаб асосий транспорт тури ер устида. Шунинг учун ҳам бу тадбир Ўзбекистон учун муҳим аҳамиятга эга”, — деди мутахассис.

Ўзбекистон халқаро автомобилда ташувчилар уюшмаси раиси Санжар Пўлатов “Дарё” мухбири билан суҳбатда юқори малакали ҳайдовчиларга талаб кўплигини айтди.

“2016–2017 йилга қадар Ўзбекистонда халқаро юк ташувлари билан 200 та атрофида корхона шуғулланарди. Ҳозир уларнинг сони 1700–1800 тага етди. Юк ташувчи автотранспорт паркимиз янги “Евро–6” автомобиллари билан кенгайди. Уларнинг сони 2017 йилда 3200 дона эди, ҳозирги кунда 22–23 мингтага етган. Ўзбекистоннинг экспорт–импорт юкларининг 68 фоизини миллий ташувчиларимиз ташимоқда. Илгари бу кўрсаткич 30 фоизга ҳам етмаган. Ўтган йили автомобиль транспорти орқали 300 мингдан кўп ташувлар амалга оширилди. Ҳозирда Европа давлатларида 500 мингдан 2 миллион нафаргача юқори малакали юк автомобиллари ҳайдовчиларига эҳтиёж мавжуд. Ўзбекистонда 5–7 минг нафар юқори малакали ҳайдовчига эҳтиёж бор”, —деди анжуман иштирокчиси.

Транспорт вазирлиги вакили Абдусамат Мўминовнинг айтишича, экпорт ва импорт ҳажми ўсгани сари юк ташувчи автомобилларга талаб ҳам ортади.

“Ҳар йили экспортимиз 15–20 фоизгача, импортимиз 25 фоизгача ошмоқда. Шунча юкни ташиш учун энг қулай транспорт турларидан бири автомобиль ташувларидир. Уларнинг қулай тарафи “эшикдан эшиккача” тамойили асосида ишлаши билан боғлиқ. Мослашувчан ҳисобланади. Юк ташувлари соҳасида ҳайдовчи деган машинага ўтириб ҳайдаб кетаверадиган эмас, халқаро ташувларни ҳам тушунадиган одам бўлиши зарур. Чунки у кўплаб чегаралардан ўтади. Айтайлик, Ўзбекистондан Европага боргунча 4–5 та мамлакатдан ўтади. Чегарадан ўтаётганда транспортнинг ўз ҳужжатлари, чекловлари, рухсат берилган масалалари бор. Бугунги кунда Транспорт вазирлиги ва Ўзбекистон ташувчилар уюшмаси Латвия ҳамда Литва мамлакатлари билан бирга катта лойиҳа қиляпмиз. Ҳозир 100 нафар ҳайдовчини Ўзбекистонда ўқитдик ҳамда уларни Европага малака оширишга жўнатяпмиз. Улар яхши ўқиб келгач, Ўзбекистонда ишлаб қолиши мумкин, агарда эплай олса, Европада ҳам қолиши мумкин. Уларнинг ойлиги камида 1500–2000 евпро бўлади. Режаларимиз ҳам шу каби ўқув курсларини кўпайтириб, ўзимизнинг қора кўзларни ўқитмоқчимиз. Ўзбекистонда юк ташувчи автомобиль ҳайдовчилар ойига камида 1000 доллар топади. Албатта, бу касбнинг азоби катта, қийинчиликлари кўп. Машиналар чегарада 5–10 кунлаб қолиб кетиш ҳоллари ҳам бўлиб туради”, —деди у.

Анжуман давомида автоташувлар соҳасида икки ва кўп томонлама ҳамкорликни янада мустаҳкамлаш, дунёдаги логистика муаммолари авжига чиққан вазиятда автомобилда юк ташувларини енгиллаштириш, бу борада мавжуд имкониятларни тўлиқ ишга солиш масалалари муҳокама қилинмоқда. Шу билан бирга, тегишли таклифлар ишлаб чиқилмоқда.