“Гилам ювдирма хотинга, хотин тенгдир олтинга” жумласи ижтимоий тармоқларда пайров қилинмоқда

Facebook ижтимоий тармоғида гилам ювдириш хизмати томонидан етказиб берувчи юк автомобилига ўрнатилган реклама плакатида ёзилган “Гилам ювдирма хотинга, хотин тенгдир олтинга” жумласи жамоатчилик томонидан пайров қилинмоқда.

Блогер Шаҳноза Соатова ўз саҳифасида мазкур рекламани “Гилам ювдириш хизматидан аёлларга ёқадиган креатив реклама. Беминнат, текин улашиб бераман аёлларни эъзозлашга чорлайдиган шундай рекламаларни!”, дея изоҳ қолдирган.

Фудблогер, ошпаз Баҳриддин Чустий ҳам пайровга қўшилган:

Овқат қилдирма хотинга,

Хотин тенгдир олтинга.

Ҳатто Адлия вазирлиги ҳам четда қолгани йўқ:

Аёл билса ҳуқуқин,

Ҳаёти бўлар ёрқин.

Адлия вазири матбуот котиби Севара Ўринбоева вазирликнинг Facebook саҳифасини тег қилган ҳолда, ўз муносабатини билдирган.

Аёлга берсанг озор,

Қонун қилар ҳор-у зор.

Туристик саёҳатлар хизматини таклиф қилган Гулноза Одилова қуйидагича муносабат билдирган:

Хотинга кам иш буюр,

Айлантириб келгин, тур!

Тармоқнинг яна бир фойдаланувчиси, сайт яратиш хизмати билан шуғулланувчи Нодирбек Раззоқов ўз касбидан келиб чиқиб, пайровни давом эттирган.

Сайт қилдирма хотинга,

Хотин тенгдир олтинга!

Тадбиркор Зафар Ҳошимов ҳам ўз йўналиши бўйича мисра ёзган:

Аёл қилмасин бозор,

Бизда Korzinka Go бор!