“Gilam yuvdirma xotinga, xotin tengdir oltinga” jumlasi ijtimoiy tarmoqlarda payrov qilinmoqda

Facebook ijtimoiy tarmog‘ida gilam yuvdirish xizmati tomonidan yetkazib beruvchi yuk avtomobiliga o‘rnatilgan reklama plakatida yozilgan “Gilam yuvdirma xotinga, xotin tengdir oltinga” jumlasi jamoatchilik tomonidan payrov qilinmoqda.

Bloger Shahnoza Soatova o‘z sahifasida mazkur reklamani “Gilam yuvdirish xizmatidan ayollarga yoqadigan kreativ reklama. Beminnat, tekin ulashib beraman ayollarni eʼzozlashga chorlaydigan shunday reklamalarni!”, deya izoh qoldirgan.

Fudbloger, oshpaz Bahriddin Chustiy ham payrovga qo‘shilgan:

Ovqat qildirma xotinga,

Xotin tengdir oltinga.

Hatto Adliya vazirligi ham chetda qolgani yo‘q:

Ayol bilsa huquqin,

Hayoti bo‘lar yorqin.

Adliya vaziri matbuot kotibi Sevara O‘rinboyeva vazirlikning Facebook sahifasini teg qilgan holda, o‘z munosabatini bildirgan.

Ayolga bersang ozor,

Qonun qilar hor-u zor.

Turistik sayohatlar xizmatini taklif qilgan Gulnoza Odilova quyidagicha munosabat bildirgan:

Xotinga kam ish buyur,

Aylantirib kelgin, tur!

Tarmoqning yana bir foydalanuvchisi, sayt yaratish xizmati bilan shug‘ullanuvchi Nodirbek Razzoqov o‘z kasbidan kelib chiqib, payrovni davom ettirgan.

Sayt qildirma xotinga,

Xotin tengdir oltinga!

Tadbirkor Zafar Hoshimov ham o‘z yo‘nalishi bo‘yicha misra yozgan:

Ayol qilmasin bozor,

Bizda Korzinka Go bor!