Тошкент вилоятидаги қурилиш-таъмирлаш ишларида 6,3 млрд сўмлик қўшиб ёзиш ҳолатлари аниқланди — Бош прокуратура

Тошкент вилояти прокуратураси томонидан давлат дастурларида белгиланган қурилиш объектларининг муддатида ва сифатли топширилиши устидан назорат тадбирлари олиб борилмоқда. Бу ҳақда Бош прокуратура матбуот хизмати хабар берди.

Қайд этилишича, ҳозирда вилоят ҳудудида жами 457 та объектда қурилиш-таъмирлаш ишлари давом этмоқда. Прокуратура органлари томонидан ўтказилган ўрганишларда 15,8 миллиард сўмлик сифатсиз ишлар ҳамда 6,3 миллиард сўмлик қўшиб ёзиш ҳолатлари аниқланган.

Жиддий қонунбузилиш ҳолатлари бўйича 63 та жиноят ишлари қўзғатилган, 12,6 миллиард сўм зарар ундирилган, 280 та прокурор назорати ҳужжатлари қўлланилган ҳамда 90 нафар шахсларнинг ҳуқуқлари тикланган.

Вилоят прокурори Сирожиддин Эшқувватов раҳбарлигида ушбу масала юзасидан соҳага масъул идора раҳбарлари иштирокида йиғилиш ўтказилган. Йиғилишда, фойдаланишга топширилиши кечикаётган объектлар муҳокама қилиниб, объектларида амалга оширилаётган ишларни сифатли бажариш, ўз муддатида фойдаланишга топшириш юзасидан штаб ҳамда ишчи гуруҳ аъзоларига кўрсатма ва топшириқлар берилган.

Бундан олдин Қаршида кўча чироқларини ўрнатиш баҳонасида 1,3 млрд сўм талон-торож қилингани, Қашқадарёда тиббиёт бирлашмаси биноси реконструкциясида 800 млн сўмга яқин маблағ ўзлаштирилгани тўғрисида хабар берилганди.