Marvel фильмларидаги Капитан Америка — Голливуд актёри Крис Эванс яширинча уйланди

Крис Эванс севгилиси Альба Баптиста билан ўртасидаги муносабатларни мустаҳкамлашга қарор қилди. Жуфтлик ўтган йилнинг кузида учраша бошлаган ва ўтган шанба куни яширинча тўй маросимини ўтказган, деб хабар бермоқда Harper’s Bazaar нашри.

Тўй маросими Массачусетс штатининг Кейп Код шаҳридаги хусусий мулкда бўлиб ўтган, у ерга Эванснинг Marvel фильмларидаги ҳамкасблари: Роберт Дауни ва унинг рафиқаси Сюзан, Крис Хемсворт, Элза Патаки, Жереми Реннер, Эмили Блант, Жон Красински ташриф буюрган.

Крис Эванс ва Альба Баптиста ҳалигача ижтимоий тармоқларга тўй маросимидаги суратларини жойлаштирмаган.

Крис Эванс — Marvel фильмларидаги Капитан Америка роли билан машҳур. Актёр 1981 йилнинг 13 июнь санасида АҚШда туғилган. У ўз карьерасини 2000 йилда бошлаган. Крис фаолияти давомида “Биринчи қасоскор” (2011 йил), “Биринчи қасоскор: Қиш аскари” (2014 йил), “Биринчи қасоскор: Қаршилик” (2016 йил), “Қасоскорлар” (2012 йил), “Қасоскорлар: Ултрон даври” (2015 йил), “Қасоскорлар: Абадият жанги” (2018 йил) ва “Қасоскорлар: Интиҳо” (2019 йил) каби фильмларда суратга тушган.