Ливиянинг Дерна шаҳрида икки мингга яқин одам “Даниэль” тўфони оқибатларидан, жумладан, сув тошқини туфайли ҳалок бўлди, деб хабар бермоқда Al-Jazeera ва Reuters Ливия шарқидаги қуролли кучлар вакилига таяниб. Шарқий Ливия ҳукумати бош вазири Усама Ҳамад ҳам қурбонлар сони шунча эканини айтди.
Ҳарбийларнинг айтишича, 5 мингдан 6 минггача одам бедарак йўқолган деб ҳисобланмоқда.
Ливия Соғлиқни сақлаш идоралари тошқин қурбонларининг тасдиқланган сони 61 киши эканини билдирди, аммо Дерна шаҳрида ҳалок бўлганлар бу ҳисобга киритилмаган.
10 сентябрь, якшанба куни Ливиянинг шарқий қисмига “Даниэль” довули ёпирилди. Табиий офат соҳил бўйидаги Жабал ал-Ахдар, Дерна ва Бенғози шаҳарларига таъсир кўрсатди. Ливия ҳукумати шарқдаги Киренаика провинциясидаги учта ҳудудни (жумладан, Дерна шаҳри) фалокат зонаси деб эълон қилди ва халқаро ёрдам сўради, деб хабар бермоқда Al Jazeera мамлакат президентлик кенгаши баёнотига таяниб.
Довул туфайли Дернани ўраб турган иккита тўғон қулаб, сув тошқинига сабаб бўлди. Сув Ливия шарқидаги кўплаб қирғоқбўйи шаҳарларида турар жойларни ювиб, уйларни вайрон қилди. Расмийлар фавқулодда ҳолат эълон қилди, мактаб ва дўконларни ёпди ҳамда комендантлик соати жорий қилди. Бирлашган Миллатлар Ташкилоти “маҳаллий ва миллий жавоб чораларини қўллаб-қувватлаш учун шошилинч фавқулодда ёрдам кўрсатишга” ваъда берди.
Ливия ҳукумати сув тошқинлари оқибатида ҳалок бўлганлар хотирасига уч кунлик миллий мотам эълон қилди.
Изоҳ (0)