AQSH davlat kotibi Entoni Blinken AQSH va Eron o‘rtasidagi mahbuslarni almashish bo‘yicha kelishuv doirasida Eronning 6 milliard dollarlik muzlatilgan aktivlarini Janubiy Koreyadan Qatarga o‘tkazishga ruxsat beruvchi buyruq chiqardi. Bu haqda 12-sentabr kuni AP va Reuters agentligi AQSH Kongressi qabul qilgan bildirishnomaga tayanib xabar berdi.

Vashington va Tehron o‘rtasidagi kelishuvning umumiy shartlariga ko‘ra, Eron tomonidan hibsga olingan besh nafar Amerika fuqarosiga aktivlarni blokdan chiqarish va AQSHda saqlanayotgan besh nafar eronlikni ozod qilish evaziga mamlakatni tark etishga ruxsat beriladi, deb yozmoqda Reuters. Kongressga yuborilgan bildirishnomada AQSH rasmiylari o‘z fuqarolarini Erondagi qamoqdan ozod qilish bo‘yicha kelishuv doirasida besh nafar eronlikni qo‘yib yuborishi ilk bor rasman tasdiqlangan.

Eron blokdan chiqqan mablag‘larni faqat gumanitar ehtiyojlar uchun sarflay oladi

Hujjatda ta’kidlanganidek, o‘tkazilgan mablag‘lar Eronga faqat insonparvarlik maqsadlarida sarflash uchun beriladi. Muzokaralar bilan tanish bo‘lgan sakkiz nafar Reuters manbasiga ko‘ra, 6 milliard dollarlik o‘tkazma va mahbuslar almashinuvi keyingi haftada amalga oshirilishi mumkin. 

Eron avgust oyida AQSHning to‘rt fuqarosini Tehrondagi qamoqxonadan uy qamog‘iga o‘tkazgan edi. Blinken buni ularning uyga qaytishiga olib keladigan jarayonning boshlanishi deb atadi. AQSH Erondan qaytarishni rejalashtirayotganlar orasida tadbirkorlar Siamak Namoziy va Emad Sharqiy, shuningdek, ekolog Morad Tahbaz bor, deb yozadi Reuters. Yana ikki kishining shaxsi oshkor etilmagan. Agentliklar Vashington Tehronga kimlarni topshirishini aniqlay olmadi.