АҚШ Қатар ва Уммондаги икки томонлама музокаралар чоғида Эрондан Россияга дронлар етказиб беришни тўхтатишни сўради. Бу ҳақда эронлик юқори мартабали амалдорга таяниб, Financial Times хабар берди.
Нашр манбасига кўра, Теҳрон бир неча бор Москвадан урушда Эрон дронларидан фойдаланишни тўхтатишни сўраган, бироқ америкалик делегациялар дронларни етказиб беришни тўлиқ тўхтатиш кўринишидаги “аниқроқ қадамлар” зарурлигини билдирган.
Тегишли суҳбат АҚШ ва Эрон ўртасида маҳбусларни алмашиш бўйича музокаралар билан параллел равишда ўтган. АҚШ Давлат котиби Энтони Блинкен Эроннинг “ортиб бораётган ядровий таҳдид”ни юмшатишга қаратилган ҳар қандай ҳаракатини олқишлашини айтган.
Британия разведкаси маълумотларига кўра, Россия Эроннинг Shahed дронлари ишланмаси асосида урушда ўзи ишлаб чиқарган дронлардан фойдаланишни бошлаган.
Россия Украинадаги урушда Эрон дронларидан фойдаланмоқда(ми)
2022 йилдан бери Ғарб давлатлари ва Украина бир неча бор Эронни Россияга дронлар етказиб беришда айблаб келади.
2022 йил июль ойида АҚШ Россия Эрондан Shahed-191 ва Shahed-129 жанговар дронларини сотиб олиш имкониятини кўриб чиқаётганини хабар берганди.
21 декабрь куни Украина президенти Владимир Зеленский Москва Теҳрондан Украина ҳудудига зарба бериш учун фойдаланиладиган 250 та камикадзе дронларини олганини айтган.
Кейинчалик Эрон ташқи ишлар вазирлиги дронларни Россияга етказиб бериш фактини тан олган, аммо хабар қилинганидан “оз миқдорда” ҳамда Украинада уруш бошланишидан бир неча ой олдин етказилганини таъкидлаган.
Изоҳ (0)