Ўзбек миллий рақс санъатининг юксак намунаси бўлмиш “Лазги — Муҳаббат ва қалб рақси” балет спектакли дунё саҳналарини забт этишда давом этмоқда. Бу ҳақда Ўзбекистон президенти ёрдамчиси Саида Мирзиёева ўзининг Telegram’даги каналига ёзиб қолдирди.
Қайд этилишича, 10 сентябрь куни Россия Катта театрида балет премьераси бўлиб ўтган.
“Мамлакатларимизнинг янги тарихида бу ҳақиқатан ҳам муҳим воқеа. UNESCO нинг инсоният номоддий маданий мероси рўйхатига киритилган қадимий Хоразм рақси — лазгига бағишланган спектакл томошабинларни рақсга ва ҳаётнинг ўзига бўлган муҳаббат тарихи билан яқиндан таништиради”, — деб ёзади Саида Мирзиёева.
Эслатиб ўтамиз, 2021 йилда Саида Мирзиёева бошчилигидаги Маданият ва санъатни ривожлантириш жамғармаси томонидан Жаҳон мероси рўйхатига киритилган лазги рақси балет кўринишида саҳналаштирилганди. 2022 йил 28–29 июнь кунлари “Лазги” балети Бурса шаҳридаги Меринос Отатурк саҳнасида намойиш этилган.
“Лазги” Хоразм рақси Ўзбекистон маданий меросининг элементи сифатида Инсониятнинг номоддий маданий мероси репрезентатив рўйхатига киритилган. Бу ҳақдаги қарор 2019 йил 12 декабрь куни UNESCO’нинг Номоддий маданий меросни муҳофаза қилиш бўйича ҳукуматлараро қўмитасининг 14-сессиясида қабул қилинган.
Изоҳ (0)