Украина президенти Владимир Зеленский сентябрь ойида Нью-Деҳлида бўлиб ўтадиган G20 саммитига таклиф қилинмади. Бу ҳақда Ҳиндистон ташқи ишлар вазири Субраманям Жайшанкар Ҳиндистон ОАВ учун ўтказилган брифингда маълум қилди.

Жаноб Жайшанкарнинг сўзларига кўра, G20 саммитида фақат саммит аъзолари, таклиф этилган мамлакатлар ва ташкилотлар иштирок этиши мумкин. Владимир Зеленскийнинг саммитда иштирок этиши мумкинлиги ҳақидаги саволга ТИВ раҳбари салбий жавоб берди. Таклиф этилганлар рўйхати Ҳиндистон G20 га раислик қилишни бошлаган пайтда эълон қилинган. Саммитга таклифнома Украина президентига юборилмаган.

“Бу кўриб чиқилаётган масала эмас. Шунингдек, биз бу масалани ҳеч ким билан муҳокама қилмадик”, деди Ҳиндистон ТИВ раҳбари.

Апрель ойида Украина ташқи ишлар вазири ўринбосари Эмине Жапарова расмий Киев сентябрь ойида бўлиб ўтадиган расмийлар саммитига Ҳиндистондан таклиф “кутаётганини” айтган эди. Жапарова хонимнинг сўзларига кўра, “сиёсий мулоқотни янада кенгайтиришга таъсир қиладиган ҳар қандай мумкин бўлган ташрифлар ва алоқалар зарур”.