Қашқадарё вилоятининг Қарши шаҳрида яшовчи эр-хотин — Баҳодир Нусуров ҳамда Дилбар Санақуловалар 17 ёшли ўғли “Док-1 Макс” сиропини истеъмол қилиши ортидан ногиронга айланиб қолганини айтмоқда. “Дарё” мухбири билан суҳбатлашган она-онага кўра, айни пайтда 18 ёшга тўлган ўғли Бунёд Нусуров биринчи гуруҳ ногиронига айланиб, доимий даволанишга муҳтож бемор ҳисобланади.
Ўғлим шамоллаб қолганини айтиб, ая “Док-1 Макс”дан олиб беринг деди. Биз бу сиропни аввал ҳам, ўғлим ёшлигида ичирганмиз. Шу сабаб, шамоллашга шу даъво деб, доридан олиб бердим. Ўғлим дорини икки маҳал ича бошлади. Дори ичиш давомида ўғлим тузалиш ўрнига, ортга кетаверди. Қайд қилиб, хавфсаласиз бўлиб қолди, — дейди бу ҳақда гапириб берган Дилбар Санақулова.
Онанинг айтишича, кўп ўтмай ўғли сиймай қўйган.
Ўғлимнинг ранглари сарғайиб, хавфсаласиз бўлиб қолгач, уят бўлса-да, ундан сийяпсанми деб сўрадим. Уч кундан бери сиймаяпман дегач, тезда шифохонага олиб бордик. Лекин шифокорлар қабул қилишмади, — дейди она.
Боланинг отаси Баҳодир Нусуровнинг айтишича, ўғлининг буйраги ишламай, аҳволи оғирлашгач, шифохонага мурожаат қилган. Аммо шифокорлар бу бизга тааллуқлли касаллик эмас дея қабул қилишмаган.
Ўғлимни аввал Қарши шаҳридаги шошилинч тез тиббий ёрдам шифохонасига олиб бордик, қабул қилмади. Ундан сўнг шаҳар шифохонаси, болалар шифохонасига олиб бордик. У ерларда ҳам қабул қилмагач, вилоят шифохонасига олиб бордик. Шифохоналар бу касаллик бизга тааллуқли касаллик эмас деб қабул қилишмади. Яна Қарши шаҳридаги шошилинч тез тиббий ёрдам шифохонасига бордик. Жанжал қилиб, ўғлимиз ўлиб қолади деганимиздан сўнг, қабул қилишди. Аввалига ўғлимда нима муаммолигини билмадик. Кейинчалик Акмал Шаропов деган шифокор, ўғлингиз нимадан бундай безовта бўлганини топдим, у “Док-1 Макс”дан заҳарланган экан деди, — дейди Баҳодир Нусуров.
Суҳбатдошнинг айтишича, шундан сўнг ўғли шифохонанинг жонлантириш бўлимига ётқизилган. Икки ой давомида комада ётган.
Ўғлимиз доридан заҳарланганини билганимиздан сўнг, кўчага чиқиб, дорихоналарни кузатдим. Дори ҳали ҳамон сотилаётганини кўрганимдан сўнг, болалар заҳарланмасин деб 10:00 ва 10:07 га қўнғироқ қилиб, бу ҳақда хабар бердим. Менинг ўғлим шу доридан заҳарланган дедим, — дейди боланинг онаси Дилбар Санақулова.
Ота-онанинг айтишича, бугунги кунда ўғли биринчи гуруҳ ногиронига айланиб, доимий даволанишга муҳтож бемор ҳисобланади.
Ҳожатга мустақил чиқолмайди. “Горшок”ка ўтиради. Қайси ота-онага фарзандини бу ҳолатда кўриш ёқади? 18 ёшли навқирон йигит шу аҳволга тушиб қолди, — дейди суҳбатдошлар.
Изоҳ (0)