Ўзбекистонда “Аҳоли саломатлиги — 2030” миллий стратегияси ишлаб чиқилади. Бу ҳақда “Соғлиқни сақлаш вазирлиги фаолиятини янада такомиллаштириш чора-тадбирлари тўғрисида”ги президент фармонида белгиланди.
Ҳужжатда қайд этилишича, ушбу стратегияни Соғлиқни сақлаш вазирлиги халқаро ташкилотлар ва хорижий консалтинг компанияларини жалб қилган ҳолда 2023 йил якунигача илғор хорижий тажриба асосида ишлаб чиқади.
Унда қуйидагиларга асосий эътибор қаратилади:
- аҳолини максимал қамраб олган ҳолда бирламчи тиббий-санитария хизматини унга янада яқинлаштириш;
- фуқароларнинг соғлом турмуш тарзини, соғлом овқатланишини ва жисмоний фаоллигини қўллаб-қувватлаш, уларни аҳоли орасида ҳар томонлама тарғиб қилиш;
- оналик ва болаликни муҳофаза қилиш, аҳолининг бу борадаги эҳтиёжларини қондириш;
- ихтисослашган тиббий ёрдам кўламини кенгайтириш;
- соғлиқни сақлаш тизимини тўлиқ рақамлаштириш, қоғозбозликка, асоссиз бюрократияга ва навбатларга чек қўйиш, аҳолига тиббиёт муассасаларига мурожаат қилганида қулайликлар яратиш;
- замонавий ва самарали бошқарув усулларини жорий қилиш ва тиббий хизматлар сифатини ошириш;
- кадрлар салоҳиятини ошириш, тиббий таълим ва илм-фанни ривожлантириш;
- хусусий секторни ривожлантириш ва инвестисияларни жалб қилиш ҳамда йирик давлат-хусусий шериклик лойиҳаларини амалга ошириш;
- тиббиёт муассасаларининг моддий-техника базасини мустаҳкамлаш;
- фармасевтика тармоғини самарали тартибга солиш.
Бундан аввал ушбу фармон билан 2024—2026 йилларда соғлом турмуш тарзини шакллантириш, тўғри овқатланишни тизимли тарғиб қилиш ва оммалаштириш дастури ишлаб чиқилиши ҳақида хабар берилган эди.
Изоҳ (0)