Украина разведкаси “Вагнер” раҳбари Евгений Пригожиннинг 23 август куни авиаҳалокатда вафот этганига ҳали юз фоиз ишонч ҳосил қилмаган. Разведка бошқармаси вакили Андрей Юсов Ukrinform’га берган интервьюсида бу ҳақда маълумот берди.
“Ҳозирда Дмитрий Уткин (‘Вагнер’ қўмондони) ва бошқа йўловчиларнинг ўлими ҳақида юз фоиз ишонч билан гапиришимиз мумкин. Пригожинга келсак, ҳали барча саволлар ёпилгани йўқ”, — деди Юсов.
Пригожин ҳақидаги фикрини батафсил баён этиш сўралганида Юсов қуйидагича жавоб берди:
“Мен фақат Уткин ва Пригожиннинг бошқа бир қанча шерикларининг ўлимини тасдиқлашимиз мумкинлигига эътибор қаратмоқчиман. ‘Вагнер’ раҳбарининг ўзига келсак, менимча, бир оз кутишимиз керак”.
У разведка фақат тасдиқланган фактлар билан ишлаши кераклигини таъкидлади.
Маълумот учун, авиаҳалокат пайти борта10 киши бўлган, уларнинг бари ҳалок бўлган. Россия Тергов қўмитаси қурбонлар орасида Пригожин борлигини тасдиқлаган.
Пригожин авиаҳалокати
Евгений Пригожин 23 август куни Москвадан Санкт-Петербургга учаётган шахсий самолёти Тверь вилоятида қулаши оқибатида ҳалок бўлди.
У билан бирга унинг “Вагнер”даги сафдошлари ҳам ўлди. Самолёт ҳалокатига айнан нима сабаб бўлгани ҳақида турли хил версиялар мавжуд: бортдаги портлашдан тортиб ракета ҳужумигача.
Пригожиннинг дафн маросими 29 август куни “ёпиқ форматда” Санкт-Петербургдаги “Пороховскоэ” қабристонида бўлиб ўтди. Видолашув маросимида 30 нафаргача одам иштирок этди, фақат яқинлар ва қариндошлари. “Вагнер” раҳбари отасининг қабри ёнига дафн этилган.
Изоҳ (0)