Россия Ташқи ишлар вазирлиги вакили Мария Захарова Австралия Украинага етказиб берган дронлар Россия Федерацияси ҳудудига зарбалар бериш учун ишлатилаётганини маълум қилди.
Захарованинг сўзларига кўра, Австралия мудофаа вазири Ричард Марлес аввалроқ Украинага етказилган Австралиянинг CОRVО дронлари фақат ҳаводан разведка қилиш, таъминот етказиб бериш ва кузатиш миссияларида қўлланилишини айтган.
“Маълум бўлишича, Австралиянинг дронларидан аслида Россиядаги нишонларга зарба бериш учун фойдаланилмоқда”, — деди Россия ТИВ вакили.
29 август куни The Sydney Morning Herald газетаси Украина Қуролли кучлари 27 август куни Курск вилоятидаги ҳарбий аэродромга ҳужум қилиш учун Австралиянинг CОRVО учувчисиз самолётларидан фойдалангани ҳақида хабар берганди.
Россия Мудофаа вазирлиги ўша куни аэродромга қилинган ҳужумни тасдиқламади, бироқ Украинанинг Курск ва Брянск вилоятларидаги объектларга дронлар ёрдамида ҳужум қилишга уринишлари ҳақида хабар берди.
CОRVО дронлари Австралиянинг SYPAQ компанияси томонидан йиғилади. Улар мумланган картон ва каучукдан қилинган. Австралия жами 33 миллион долларлик бундай дронларни Украинага совға қилган.
Изоҳ (0)