Қашқадарё вилоятининг Деҳқонобод туманида раҳбарлик қилиб келаётган ҳоким Зоир Алиқулов «Дарё» журналисти билан суҳбатида ҳокимлик машаққати ва масъулияти ҳақида гапирди.
Биласизми, ҳокимлар елкасида катта юк ва масъулият бор. Аввал ҳам бу юк оғир ва масъулиятли бўлган. Лекин бугун бу масъулият икки ҳиссага ортди. Ҳурматли президентимиз билан бирга Янги Ўзбекистонни бунёд этишга киришган ҳокимлар ҳам бугун буни ҳис этмоқда. Шахсан ўзим ҳам фаолиятим давомида туман ривожи учун бугун нималар қилишга улгурдим-у, нималарга улгурмадим дея ҳар куни ўзимга ўзим савол бераман, — дейди Деҳқонобод тумани ҳокими Зоир Алиқулов.Туман ҳокими журналистнинг «Олти йиллик фаолиятингизнинг ҳар бир йили халқ ёдида қандай қолди деб ўйлайсиз?», деган саволига «Шу саволни доим ўзимга ўзим бераман ва жавоб тополмасам, тиниб-тинчимайман ва мақсадимга эришишга ҳаракат қиламан», деди.
Зоир Алиқуловнинг маълумот беришича, у Қашқадарё вилоятининг Деҳқонобод туманида 2016 йилнинг июнь ойидан бери ҳокимлик қилиб келади.
Тан олиш керак, фаолиятимиз давомида хато-камчиликларимиз ҳам бўлади. Инсонмиз. Улгурмаган ёхуд тугатолмаган ишларимиз ҳам бор, албатта. Деҳқонободда яшовчи 150 минг нафардан ортиқ аҳолининг кўнглини топиш мушкул. Лекин шунга қарамасдан туманда аҳолининг энг кўп мурожаатлари, ишсизлик, йўл, кўприклар қурилиши, сув, уй-жой билан таъминлаш бўйича муаммоларга эътибор қаратмоқдамиз, — дейди у.Зоир Алиқулов «Дарё» журналистининг сўровига жавобан фаолияти давомида амалга оширган тумандаги энг катта ишларни санаб берди.
Туманда тадбиркор Ваҳоб Норсафаров томонидан ташкил этилган 367 гектар майдонда пистачилик плантацияси яратилди. Ушбу плантация муҳтарам президентимиз топшириғига асосан ташкил этилиши режалаштирилган 2,5 минг гектарлик плантациянинг бир қисми ҳисобланади. Плантациядан йилига 1 миллион доллар даромад олиниши кутилмоқда. Асосий ишларимиздан бири азалдан Деҳқонобод тумани аҳолисининг орзуси бўлиб келган, 2018 йилда президентимиз томонидан илгари сурилган Оқсув-Деҳқонобод лойиҳасининг ишга туширилиши бўлди. Лойиҳанинг биринчи босқичи якунланди. Биринчи босқичда туман марказидан 78 км узоқликдаги тоғдан тоза ичимлик суви келтирилди. Ва мазкур ишларга 226 миллиард сўм маблағ сарфланди. Шунингдек, айни пайтда лойиҳанинг иккинчи босқичи давом этмоқда. Иккинчи босқичда туманнинг 116 та қишлоғини тоза ичимлик суви билан таъминлаш кўзда тутилган. Айни кунга қадар тумандаги тўртта маҳаллага сув қувурлари тортилиб, тоза ичимлик суви билан таъминланди.Бундан ташқари туман ҳудудида яшовчи аҳолини арзон ва сифатли уй-жой билан таъминлаш мақсадида Деҳқонобод City лойиҳаси бошлаб юборилди. Ушбу лойиҳа асосида 1036 та хонадон эгаси арзон, сифатли ва барча замонавий қулайликларга эга уй-жой билан таъминланади. 1976 йилда қурилган, сўнгги пайтларда қаровсиз аҳволга келиб қолган истироҳат боғи Деҳқонобод тумани аҳолисининг талаб ва истакларига биноан, 2021 йилда қайта таъмирланди ва боғда амфитеатр қурилди, кўнгилочар аттракционлар ишга туширилди.
Шу билан бир қаторда, 600 минг электрон китоб фондига эга бўлган замонавий кутубхона барпо этилди. Мазкур кутубхона ишга тушгандан сўнг, Деҳқонобод туман ҳокимлиги томонидан ҳомийлик асосида 100 минг китоб совға қилинди. Бундан ташқари ҳозирги кунда ҳомийлар ташкилотлар томонидан китоблар совға қилиб борилмоқда, — дейди туман ҳокими.
Зоир Алиқуловнинг қўшимча қилишича, туман аҳолисининг бандлигини таъминлаш мақсадида, ташаббускор тадбиркор томонидан 500 иш ўрнига эга тикув фабрикаси қурилиши якунланиш арафасида. Мазкур лойиҳа ишга тушгач, Деҳқонободда яшовчи 500 нафар аҳолининг бандлиги таъминланади. Лойиҳа ишга тушишига 60 млрд сўм маблағ сарфланмоқда.
Зоир Алиқулов «Деҳқонобод тумани азалдан жин кўприклари билан машҳур туман, хўш, аҳолининг кўприклар муаммоси қандай ҳал этилмоқда, бу борада нималар қилинди», деган саволга жавобан туманда 70 дан ортиқ катта-кичик кўприклар қурилганини маълум қилди.
Фаолиятим давомида 70 дан ортиқ катта-кичик кўприклар қурилишини амалга оширдик. Туман марказидан узоқ ва сел йўлида аҳоли томонидан ҳашар йўли билан қурилган жин кўприкларнинг айримлари имкониятдан келиб чиқиб, замонавий, автомобиллар ҳаракати учун ҳам талабга жавоб берадиган кўприкларга айлантирилган бўлса, яна бошқалари эса аҳолининг ўти-қайтиши учун хавфсиз, ихчам кўприкларга алмаштирилди», — дейди ҳоким.
Изоҳ (0)