Грузиянинг ҳукмрон партияси мамлакат президентига қарши импичмент жараёнини бошлади

Грузиянинг ҳукмрон партияси “Грузия орзуси — Демократик Грузия” ҳукумат рад этганига қарамай, президент Саломе Зурабишвили Европага сафар қилгани туфайли унга қарши импичмент жараёнини бошлайди. Бу ҳақда брифингда партия раиси Ираклий Кобахидзе айтиб ўтди.

Грузиянинг ҳукмрон партияси президент Германияга ташрифи орқали конституцияни бузганини айтиб ўтди.

“Импичментни якунлаш учун 100 нафар парламентарийнинг қўллаб-қувватлаши талаб қилинади, бундан ташқари, радикал мухолифатнинг овозисиз уни ижро этишнинг иложи йўқ. Бироқ, шунга қарамай, партия сиёсий кенгаши йиғилишида президентга қарши импичмент жараёнини бошлашга қарор қилди”, — деди Кобахидзе.

Унинг тушунтиришича, Зурабишвили конституцияни қўпол равишда бузган, унга кўра, президент ташқи сиёсатда вакиллик функцияларини фақат ҳукумат розилиги билан амалга ошириши мумкин. Кобахидзенинг сўзларига кўра, президентнинг импичменти “радикал мухолифат ва Саломе Зурабишвилининг Грузиянинг давлат манфаатларига, ҳамда ЕИга аъзолик учун номзод мақомини олишга зид бўлган умумий кун тартибини фош қилади”.

Партия раисининг таъкидлашича, Зурабишвили “икки томонлама ўйин қиляпти” — бир томондан, Грузиянинг ЕИга номзод мақомига эга бўлиш имкониятлари юқори эканини била туриб, ўзи учун сиёсий “очколар” қўлга киритишга ҳаракат қилмоқда, иккинчи томондан, мамлакатнинг мақом олишига тўсқинлик қиладиган ҳаракатларни амалга оширмоқда.

Грузия конституцияси, Кобахидзе таъкидлаганидек, агар бузиладиган бўлса, фақат битта самарали ҳуқуқий механизмни — импичментни назарда тутади.

Аввалроқ Грузия президенти администрацияси Зурабишвилининг Европага режалаштирилган ташрифи ва йил охирида республиканинг ЕИга номзод мақомини олишини қўллаб-қувватлаш мақсадида Европа етакчилари билан учрашувлар ўтказиши ҳақида хабар берган эди. Бир кун олдин Зурабишвили Берлинда Германия президенти Франк-Валтер Штайнмаер билан учрашди. Жума куни у Брюсселда Европа кенгаши раҳбари Чарльз Мишел билан учрашиши режалаштирилган. Грузия ҳукумати аввалроқ Зурабишвилининг августдан декабргача турли мамлакатларга режалаштирилган сафарларини ёзма равишда рад этганини маълум қилганди.