30 августга ўтар кечаси Псков халқаро аэропортига дронлар ҳужум қилди, деб хабар бермоқда Россиянинг Псков вилояти губернатори Михаил Ведерников. У Россия ҳарбийлари дрон ҳужумини қайтараётганини ёзган.
“Бошиданоқ шахсан ўзим воқеа жойида бўлдим. Дастлабки маълумотларга кўра, қурбонлар йўқ. Вайронагарчилик кўлами аниқланмоқда”, — деди вилоят раҳбари.
Маҳаллий аҳоли портлашлар ва ўқ овозларини эшитганини айтди, деб ёзади “Псковская губерния”, нашр аэропорт яқинидаги портлашлар ҳақида биринчилардан бўлиб хабар берган. Турли манбаларга кўра, аэропортга 10-20 та дрон ҳужум қилган, уларни уриб тушириш учун ўт очилган. Россия Мудофаа вазирлиги ҳужумга ҳозирча изоҳ бермади.
Дастлабки маълумотларга кўра, аэропортга ҳужум чоғида тўртта Ил-76 ҳарбий-транспорт самолёти шикастланган, деб ёзади “ТАСС” фавқулодда хизматларга таяниб. База эса иккита шикастланган самолёт ҳақида ёзди, зарар кўлами номаълум. Псков аэропортида Ил-76 самолётлари билан қуролланган 334-ҳарбий-транспорт полки жойлашган эди.
Дастлабки маълумотларга кўра, дронлардан бири аэропорт ҳудудидаги ёнилғи қуйиш мажмуасига келиб урилган, шундан сўнг катта ёнғин бошланган, дея аниқлик киритади Маsh Telegram канали. Shot маълумотларига кўра, ёнилғи баки ёниб кетган. Ярим тунда ёнғин ўчирилгани ҳақида хабарлар пайдо бўлди.
Псков, вилоят ва унинг атрофидаги ҳудудлар осмони самолёт парвозлари учун бутунлай ёпиқ, деб ёзади Маsh. Авиация хизматлари “ТАСС” агентлигига буни тасдиқлади. Чоршанбага ўтар кечаси Псков аэропортида фуқаролик рейслари амалга оширилмаган.
Ҳужум нишони аэропорт яқинида жойлашган нефть омбори бўлиши ҳам мумкин, деб ёзади Псков вилояти. Бошқа бир версияга кўра, зарбалар 2022 йилда Бучага ҳужумда иштирок этган 104-ҳаво десант-ҳужум полки жойлашган Черехинский ҳарбий базасига қаратилган бўлиши мумкин.
Изоҳ (0)