Qashqadaryo viloyatining tuman va shaharlarida mustaqillikning 32-yilligi munosabati bilan bayram tantanalari bo‘lib o‘tdi. Bu haqda xabar bergan “Daryo” muxbiri bayramning eng qiziq va diqqatga sazovor joylarini suratga oldi.
Dastlab viloyatning Dehqonobod tumanida boshlangan bayram ko‘p o‘tmay Mirishkor va Muborakda, so‘ngra Qarshi, Chiroqchi, Shahrisabz hamda Ko‘kdala tumanlarida ham davom etdi.
Dehqonobodda “Yangi hayot uchun, Yangi O‘zbekiston uchun” shiori ostida boshlangan bayram tadbiri tuman hokimi Zoir Aliqulovning kirish so‘zi bilan boshlanib, erishilgan yutuqlarni maʼlum qilish bilan davom ettirildi. Keyin sahnada ko‘rinish bergan Umida Mirhamidova tuman ahliga ko‘tarinki kayfiyat ulashib, kechaga fayz bag‘ishladi.
Viloyatning chekka tumanlaridan biri Mirishkorda ko‘rinish bergan Shohruxxon “Do‘stlik” ordenini qo‘lga kiritganini mirishkorliklar davrasida eshitdi va quvonchini tuman ahli bilan birga baham ko‘rdi. So‘ngra bayram kechasida “Alamli” taronasi bilan sahnaga chiqib kelgan Shoira Otabekova qashqadaryoliklarni bayram bilan qutladi.
G‘uzor tumanida bo‘lib o‘tgan Mustaqillik bayramida dastlab tuman hokimi Bekzod Suyunov tuman ahlini bayram bilan qutlab, mazkur yilda aholi farovonligi yo‘lida amalga oshirilgan ishlarni sanab o‘tdi. So‘ng estrada xonandasi Sardor Bekmurodov dilkash taronalarini kuylab, odamlarni o‘yinga tushirdi.
Qashqadaryo viloyatining so‘lim Kitob tumani markaziy o‘yingohidagi bayram tadbirida chiqish qilgan estrada xonandasi Gulinur kitobliklarga yuqori kayfiyat ulashish barobarida, barchani raqsga chorladi.
.jpg)
Viloyat markazi Qarshi shahridagi Amfiteatrda davom etgan tantanalar avvalida viloyat hokimi Murodjon Azimov so‘z olib, prezident tashabbusi bilan boshlangan mahallalar infratuzilmasini yanada yaxshilash dasturiga ko‘ra, viloyatda qiymati 530 milliard so‘mlik 687 ta obyekt foydalanishga topshirilganini bildirdi. 2,5 trillion so‘m mablag‘ ajratilishi evaziga 1700 ta obyektda qurilish-taʼmirlash ishlari amalga oshirilayotganini qo‘shimcha qildi.
“Tashabbusli budjet” va “Mening yo‘lim” loyihalari doirasida ichki yo‘llarning taʼmiri uchun 200 milliardga yaqin, ijtimoiy soha obyektlari uchun 65 milliard so‘m va boshqa tadbirlar uchun 25 milliard so‘m mablag‘lar ajratilib, ishlar yuqori surʼatda olib borilmoqda. Elektr taʼminotini yaxshilash bo‘yicha 324 km elektr tarmoqlari va 200 dona transformator punktlarini qurish va taʼmirlash ishlari amalga oshirildi, — dedi viloyat rahbari.
Hokim chiqishidan so‘ng sahnada Botir Qodirov hamda Gulsanam Mamazoitova kabi estrada yulduzlari ko‘rinish berib, qashqadaryoliklarga bayram kayfiyatini ulashdi.
Izoh (0)