Сурхондарё вилоятининг Олтинсой туманида автомобиль йўлини кенгайтириш ҳамда шу йўлдаги кўприкни реконструкция қилиш мақсадида кўп йиллик манзарали дарахтлар кесиб ташлангани аниқланди. Бу ҳақда вилоят Экология бошқармаси ахборот хизмати хабар берди.
Унга кўра, Олтинсой туманининг “Миршоди” маҳалласи ҳудудидан ўтувчи, Олтинсойни Денов тумани билан боғловчи автомобиль йўлини кенгайтириш, ушбу йўлдаги “Қора ариқ” кўпригини реконструкция қилиш мақсадида йўл ёқаларида мавжуд бўлган кўп йиллик дарахтларни кесиш учун туман ҳокимлигининг маъсул ходими туман Экология бўлимидан оғзаки тарзда рухсат сўраган.
Олтинсой туман Экология бўлими ходимлари Фурқат Сафаров, Ойбек Хўшбоқовлар томонидан ҳолат жойига бориб ўрганилиб, ҳудудда мавжуд бўлган дарахтлар хатловдан ўтказилади ва дарахтларни ноқонуний равишда кесиш амалдаги қонунчиликка биноан жавобгарликка тортилиши тушунтириб ўтилади.
Шунга қарамасдан, номаълум шахслар томонидан кечқурун ҳудудда мавжуд бўлган, ўсувчанлигини йўқотмаган 61 туп қимматбаҳо навли дарахтларни (2 туп чинор, 54 туп виргин арчаси) манзарали дарахтларни, 6 туп кам қимматли дарахтларни (2 туп терак, 4 туп тол) таг қисми билан кесиб ташланган.
Вилоят Экология бошқармасининг тезкор гуруҳи шу кунинг ўзида ҳолат содир этган жойга етиб бориб, ҳолат юзасидан баённома тузилади. Мутахасисларнинг ҳисоб китобларига кўра ушбу ноқонуний ҳаракат оқибатида ўсимлик дунёсига 293 миллион 700 сўм зарар етказилган. Мазкур ҳолат бўйича вилоят Прокуратураси томонидан жиноят иши қўзғатилган бўлиб, ҳозирги кунда терговга қадар суриштирув ишлари олиб борилмоқда.
Изоҳ (0)