Украина президенти Владимир Зеленский “Вагнер” раҳбари Евгений Пригожиннинг самолёти қулаб тушганига муносабат билдирди. Самолётда бўлган йўловчилар рўйхати орасида Пригожин бор. Бу ҳақда “РБК-Украина” хабар берди.
Зеленский Пригожин самолёти ҳалокатига Украинанинг алоқадорлигини рад этди.
“Украина самолёт бўйича гапирганда ва дунё мамлакатларига мурожаат қилганда буни назарда тутмаган эдик, балки қўллаб-қувватловни хоҳлагандик.
Гарчи, эҳтимол, бу ҳам қайсидир маънода ёрдам беради. Биринчидан, бу ҳолатга бизнинг ҳеч қандай алоқамиз йўқ, бу аниқ. Авиаҳалокатга кимнинг алоқаси борлигини ҳамма тушунади”, — деди Зеленский.
Пригожин самолёти ҳалокати ҳақида нима маълум?
23 август куни Россиянинг Тверь вилоятида “Вагнер” раҳбарига тегишли самолёт ҳалокатга учради, унинг бортида 10 киши бўлган. “Росавиация” самолёт йўловчилари рўйхатида Пригожин ва унинг ўринбосари Дмитрий Уткин борлигини маълум қилди. Расмий равишда, “Вагнер” раҳбарининг ўлими ҳали тасдиқланмаган.
Россия давлат оммавий ахборот воситалари қутқарувчилар самолётдаги барча 10 йўловчининг жасадини топгани ҳақида хабар берган. Шу билан бирга, самолёт ҳаво ҳужумидан мудофаа тизими томонидан йўқ қилингани, портлатилгани ҳақида версиялар бор.
“Росавиация”нинг махсус тузилган комиссияси самолётнинг қулаш ҳолати ва сабабларини ўрганишга киришган. Мутахассислар “қора қутилар”даги ёзувларни топиб, ўрганиб чиқиши керак бўлади.
Изоҳ (0)