24 августнинг биринчи ярмига қадар Евгений Пригожиннинг ўлими расман тасдиқлангани йўқ. Шу билан бирга, BBC нинг “Вагнер”даги олти нафар суҳбатдоши самолёт йўловчилари рўйхатида бўлган Пригожиннинг ўлимини “у ёки бу шаклда” тасдиқлади. Пригожин ва “Вагнер” қўмондони Дмитрий Уткин ҳалок бўлгани ҳақида 23 август куни кечқурун “Вагнер”га яқин Grey Zone Telegram канали ва Кремлпараст “Сарград” телеканали хабар берганди.
Тверь вилоятидаги Куженкино қишлоғи яқинида қулаган Пригожиннинг Embraer самолёти парчаси. 2023 йил 24 август.
Embraer Legacy 600 самолёти қулаши оқибатида ҳалок бўлганларнинг жасади суд-тиббиёт экспертизасига олиб кетилди, деб хабар бермоқда “Фонтанка” ва Shot Telegram канали. Shot маълумотларига кўра, дафн маросими хизматларини кўрсатувчи иккита машина Тошкент вақти билан соат 06:30 да самолёт қулаган зонага кириб, соат 8 да у ердан жўнаб кетган. Нашрларнинг таъкидлашича, жасадлар суд-тиббиёт экспертизаси бюроси жойлашган Тверь ўликхонасига олиб кетилади. Ҳалокат содир бўлган жойда криминологлар ишламоқда.
Самолётлар парвозини кузатувчи Flightradar24 сервиси бизнес-жет ҳалокати ҳақидаги ҳисоботни чоп этди. Самолёт Тошкент вақти билан 19:46 да сервисга ўзи ҳақидаги маълумотларни узатишни бошлаган. Ҳисоботдан маълум бўлишича, соат 20:10 га келиб самолёт 28 минг фут (тахминан 8,5 километр) баландликка кўтарилган. Бундай баландликдаги парвоз 20:19 гача давом этган. Бир неча дақиқа ўтиб, самолёт пастлаган, сўнг яна баландликка кўтарилган (максимал — 30,1 минг футгача, яъни тахминан 9,1 километр).
Flightradar24 тақвимига кўра, соат 20:19 да самолёт қулашни бошлаган. Сервис матбуот котиби Ян Петченик Reuters агентлигига самолёт 30 сонияда 8 000 фут (2,4 километр) йўқотганини айтди.
The Bell ҳалокатдан олдин самолёт пастламагани, балки баландликка кўтарилишни давом эттирганига эътибор қаратди – “яъни, ҳалокат тез ва кутилмаганда содир бўлган”. Самолёт қулаши акс этган видеода учоқ қаноти ва думининг бир қисми йўқ ҳолда ерга текис яқинлашаётгани сезилади. Гувоҳларнинг айтишича, иккита портлаш овози эшитилган.
Россия Тергов қўмитаси теракт бўйича иш очиш учун ҳеч қандай асос йўқлигини маълум қилди. Бу ҳақда “Коммерсант”га Тергов қўмитасининг Ғарбий минтақалараро тергов бошқармаси хабар берди. Самолёт ҳалокатидан кейин ТҚда хавфсизлик қоидалари ва транспорт воситасидан фойдаланиш қоидаларини бузиш моддаси бўйича жиноий иш қўзғатилди. “РБК”нинг ҳуқуқ-тартибот идораларидаги манбаси терговда содир бўлган воқеанинг барча версиялари, жумладан, “учувчи хатоси, техник муаммолар ва ташқи таъсирлар” кўриб чиқилаётганини айтди. Исмини ошкор этмаган Ғарб мулозимининг Financial Times нашрига айтишича, ундаги маълумотларга кўра, самолёт Россиянинг зенит-ракета мажмуаси томонидан уриб туширилган. У ушбу маълумотни қаердан олганини ошкор қилмади.
Жасадлардан бирининг ёнидан Пригожиннинг телефони топилди, деб хабар бермоқда Al Jazeera “Вагнер”даги манбасига таяниб. Пригожиннинг жасади ҳозирча аниқланмаган, дея қўшимча қилди телеканал суҳбатдоши.
Санкт-Петербургдаги “Вагнер” маркази биноси ёнида стихияли ёдгорлик пайдо бўлди. “Фонтанка” ёзишича, одамлар Золная кўчасидаги бинога гуллар ва шамлар олиб келмоқда. Нашр мухбири аксарият одамлар тунги иккилар атрофида тарқалганини хабар қилди.
Изоҳ (0)