АҚШ президенти Жо Байден журналистларга берган интервьюсида “Вагнер” асосчиси Евгений Пригожиннинг эҳтимолий ўлими ҳақидаги тафсилотларни билмаслигини айтди.
“Нима бўлганини аниқ билмайман, лекин ҳайрон қолганим йўқ”, — деди Байден.
Журналистларнинг самолёт ҳалокатида Владимир Путинни айбдор деб ҳисоблайсизми, деган саволига АҚШ президенти шундай жавоб берди:
“Россияда ортда Путин турмаган ишлар камдан-кам бўлади. Жавоб бериш учун менда етарли маълумот йўқ”.
Пригожиннинг самолёти ҳалокатга учради
23 август куни кечқурун Тверь вилоятида “Вагнер” асосчиси Евгений Пригожинга тегишли самолёт ҳалокатга учради. Федерал ҳаво транспорти агентлиги маълумотларига кўра, йўловчилар рўйхатида Пригожин, хусусий ҳарбий компания командири Дмитрий Уткин бор эди.
Гуруҳга яқин бўлган Grey Zone Telegram канали Пригожин ва Уткиннинг вафоти ҳақида хабар берди. “Вагнер”га алоқадор бўлган бошқа канал Пригожиннинг тақдири ҳақида тасдиқланмаган маълумотларни нашр этмасликка чақирди.
Пригожин самолётининг ҳалокати “Вагнер” асосчисининг исёнидан роппа-роса икки ой ўтгач содир бўлди.
“Интерфакс”нинг ёзишича, Пригожиннинг бизнес-жети қулаган жойда қидирув ишлари якунланган. 10 кишининг жасади топилган.
Изоҳ (0)