“Пригожин ўлдирилмаса, Россиянинг кейинги президенти бўлади” — КГБ собиқ ходими

Россия КГБ ва Ташқи разведка хизматининг собиқ ходими Сергей Жирнов “Вагнер” раҳбари Евгений Пригожин ўлдирилмаса, у Россиянинг кейинги президенти бўлишини айтди. Бу ҳақда 24Kанал хабар берди.

Маълум қилинишича, “Вагнер” исёнининг муваффақиятсизлиги арафасида юқори мартабали россиялик ҳарбийлар ва Пригожин ўртасидаги телефон алоқаси тинмаган. Пригожин ўзига бўйсунувчи қуролли жангарилар армиясига, шунингдек, миллиардларга ва медиа империясига эгалик қилиши таъкидланади.

“Пригожин ё ўлдирилган ёки қамоққа ташланган. Ким уни тирик, соғлом кўрди? 24 июндан кейин ҳеч ким Пригожинни бундай ҳолда кўрмади”, — дейди КГБ собиқ ходими.

Тахминларга кўра, тармоқда “Вагнер” раҳбари тасвирланган сурат намойиш этилган. Бироқ собиқ разведкачи у қалбакилаштирилган бўлиши мумкинлигини айтди. “Вагнер” исёнидан кейин тарқалган Пригожин аудиоси ҳам Москвадаги Лефортово тергов ҳибсхонасидан ёзиб олинган бўлиши мумкинлигини билдирди.

“Кўрсатилган бирорта ҳам видео, аудио ёки фотосурат ҳеч нарсани исботламайди”, — деди Жирнов.

У Россия элитаси Евгений Пригожин билан музокара олиб бориши мумкинлигини қайд этди. 

“Путинни урушдан пул топадиганлардан ташқари ҳамма ёмон кўради”, — дея хулоса қилди Жирнов.

Россияда исёнга уриниш ёхуд Пригожин исёни

2023 йил 23-24 июнь кунлари Россияда “Вагнер” хусусий ҳарбий кампанияси раҳбари Евгений Пригожин томонидан исён кўтаришга уриниш бўлди. Хусусан, Пригожин “Адолат марши”ни бошлаганини, унинг мақсади Москвага етиб бориш эканини айтди.

У рус ҳарбийларини Россия мудофаа вазири Сергей Шойгу ва Бош штаб бошлиғи Валерий Герасимов буйруғи билан “Вагнер” лагерларига ҳужум қилганликда айблади.

Қўзғолон пайтида Ростов-Дон ва Воронеж қўлга олинди, бир нечта вертолётлар ва ҳарбий самолётлар уриб туширилган, оқибатда камида ўн нафар рус ҳарбийси йўқ қилинган.

Россия президенти Владимир Путин Пригожинни давлатга хиёнатда айблади. Бироқ кечқурун, Беларусь раҳбари Александр Лукашенко билан музокаралардан сўнг Пригожин ўз жангариларининг Москвага юришини тўхтатди.

Кремль Пригожинга қарши қуролли исён бўйича жиноий иш тўхтатилиши, вагнерчилар жиноий жавобгарликка тортилмаслиги ва Пригожиннинг ўзи Беларусга кетиши мумкинлигини билдирди.

Бир неча кундан сўнг Путин ўз армияси ва хавфсизлик кучларига исённинг олдини олгани учун миннатдорлик билдирди.