Япония Украинага 7 миллиард доллар миқдорда ёрдам беради, деди мамлакат бош вазири Фумио Кишида Киевдаги халқаро Қрим платформасининг 3-саммитида онлайн тарзда сўзлаган нутқида.
“Япония доимий равишда Украинага эҳтиёждан келиб чиқиб, 7 миллиард АҚШ долларигача бўлган миқдорда турли ёрдам кўрсатади”, — деди у.
Бундан ташқари, Япония урушдан кейинги реконструкция ва табиий офатларни тиклаш бўйича ўз билими ва тажрибасидан ёрдам кўрсатиш учун фойдаланади, деди у.
Кишида Япония Украинанинг, шу жумладан Қримнинг суверенитети ва ҳудудий яхлитлигини доимий равишда қўллаб-қувватлашини ва халқаро ҳамжамият, жумладан G-7 давлатлари билан яқин ҳамкорликни давом эттиришини ва Украинага доимий ёрдам кўрсатиб, Россияга қарши санкцияларга қўшилишини яна бир бор таъкидлади.
“Мен шу йилнинг март ойида Киев ва Буча шаҳарларида бўлиб, фожиага ўз кўзим билан гувоҳ бўлдим. Россиянинг Украинага қарши тажовузкор ҳаракатлари халқаро тартиб асосларига зид бўлган фавқулодда ҳаракат эканлигига ишончим тасдиқланди”, — деди у.
Кишида “Япония тинчликни таъминлаш ва уни Украина заминига қайтариш учун Украина халқи томонида” эканини ҳам таъкидлаган.
Изоҳ (0)