Тверь вилоятида 23 август куни самолёт ҳалокатга учради, унинг йўловчилари орасида “Вагнер” асосчилари Евгений Пригожин ва унинг ўринбосари Дмитрий Уткин ҳам бор эди. Бортда жами 10 киши бўлган, жумладан, уч экипаж аъзоси. Авиаҳалокатда уларнинг бари ҳалок бўлгани айтилмоқда, гарчи Пригожиннинг ўлими ҳали расман тасдиқланмади.
Embraer бизнес-жети Куженкино қишлоғи яқинида қулаган, ҳудудга кириш йўли ҳозирда ОМОН ва полиция томонидан тўсиб қўйилган.
Россия Фавқулодда вазиятлар вазирлиги маълумотларига кўра, бортда ўн киши бўлган, уларнинг барчаси ҳалок бўлган.
Al-Jazeera телеканали “Вагнер” кампаниясидаги манбасига таяниб, Пригожиннинг телефони ҳалокат жойидан топилганини маълум қилди.
Flightradar24 хабарига кўра, Москва вақти билан 18:10 да самолёт тахминан 8,5 километрга кўтарилган. Бу баландликдаги парвоз 18:19 гача давом этган. Кейин самолёт 9,2 километргача кўтарилиб, яна пастлаган. Авиатехника Москва вақти билан соат 18:20 гача маълумотларни узатган. Ўша пайтда у 6 километр баландликда бўлган.
Тергов воқеанинг барча версияларини, жумладан, учувчи хатоси, техник муаммолар ва ташқи таъсирларни кўриб чиқмоқда.
Авиаҳалокат иши Тергов қўмитасининг алоҳида муҳим ишларни тергов қилиш бош бошқармаси терговчиси Иван Сибулга топширилган. Илгари у авиаҳалокатларга алоқадор шов-шувли ҳолатларни текширган.
Ҳалокат пайтида осмонда Пригожин фойдаланган яна бир самолёт бўлган, унинг борт рақами — RA-02748. Flightradar24 хизмати ва Фонтанка маълумотларига кўра, у Москва яқинидаги Остафево аэропортига қўнган.
Самолёт қисмларидан бири ҳалокат жойидан 2 километр узоқликда топилган. Кейинроқ яна 3,5 километр узоқликда самолётнинг дум қисми аниқланган.
Самолёт Бологовский туманидаги Куженкино қишлоғи яқинида қулаган. Қишлоқ Тверь вилоятининг шимоли-ғарбий қисмида жойлашган. Москвагача бўлган масофа тахминан 300 километрни ташкил қилади.
Изоҳ (0)