Flightradar24 хизмати Тверь вилоятида ҳалокатга учраган “Вагнер” хусусий ҳарбий кампанияси раҳбари Евгений Пригожинга тегишли Embraer-135 бизнес-жети парвози ҳақида ҳисобот берди.
Самолёт парвоз маълумотларини UТC 14:46 (Москва вақти билан 17:46) да узатишни бошлаган. Авиатехника Москва вақти билан 18:10 да 28 минг фут (тахминан 8,5 километр) баландликка кўтарилган. Парвоз 18:19 гача давом этган. Шундан сўнг учоқ тартибсиз тарзда баландликка (максимал 30,1 минг фут ёки 9,2 километргача) кўтарила бошлаган ва яна пастга тушган.
Москва вақти билан соат 18:20 гача бизнес-жет парвози ҳақида маълумот берилган, ўшанда самолёт 19,7 минг фут (тахминан 6 километр) баландликда бўлган.
Flightradar24 матбуот котиби Ян Петченик аниқлик киритишича, Пригожиннинг самолёти 30 сонияда 8000 фут (2,4 километр) баландликдан қулаган.
Шундан сўнг, самолёт маълумотларни узатмаган, бироқ Flightradar хизмати парвознинг сўнгги дақиқалари ҳақидаги айрим маълумотларни, жумладан, баландлик, тезлик, вертикал тезликни кузатиб борган.
Пригожин самолёти ҳалокати: “Росавиация” бортда “Вагнер” раҳбари бўлганини тасдиқлади
23 август куни Тверь вилоятида Embraer-135 самолёти ҳалокатга учради. Самолётда 10 киши бўлган, барчаси ҳалок бўлган. “Росавиация” самолётдаги йўловчилари рўйхатини эълон қилган:
- Пригожин Евгений
- Пропустин Сергей
- Макарян Евгений
- Тотмин Александр
- Чекалов Валерий
- Уткин Дмитрий (“Вагнер”қўмондони)
- Матусеев Николай
Экипаж аъзолари:
- Левшин Алексей — қўмондон;
- Каримов Рустам — иккинчи учувчи;
- Распопова Кристина — стюардесса.
Авиаҳалокатга теракт сабаб бўлгани ҳам илгари сурилган, аммо аниқ ҳолатлар экспертлар томонидан аниқланмоқда. Ҳолат юзасидан Россия Жиноят кодексининг 263-моддаси ҳаракат хавфсизлиги ва ҳаво транспортидан фойдаланиш қоидаларини бузиш бўйича тергов ҳаракатлари олиб борилмоқда.
Изоҳ (0)