Ўзбекистон етти ойда салкам 673 млн долларлик мева-сабзавот экспорт қилди

Ўзбекистон 2023 йилнинг январь июль ойларида 1,1 миллион тонна мева-сабзавотлар экспортини амалга оширди, деб хабар беради Статистика агентлиги.

Қайд этилишича, ушбу кўрсатгич 2022 йилнинг мос даврига нисбатан 1,2 баробарга ёки 153,8 минг тоннага кўпайган.

Ўзбекистон мева-сабзавот маҳсулотларининг асосий экспорт бозорлари Россия (41,8 фоиз), Покистон (14,6 фоиз), Қозоғистон (12 фоиз) ҳамда Қирғизистон (9,1 фоиз) ҳиссасига тўғри келган.

2023 йилнинг январь июль ойларида хорижга қиймати 672,9 миллион долларлик мева-сабзавот экспорт қилинган. Бу кўрсаткич 2022 йилнинг мос даврига нисбатан 22,4 фоизга кўпайган ва жами экспортдаги улуши 4,5 фоизни ташкил этган.

Марказий банкнинг июль ойида эълон қилинган пул-кредит сиёсати шарҳида минтақада сув танқислиги муаммоси жиддий тус олаётгани сабаб мева ва сабзавотлар нархи юқори тебраниши мумкинлиги келтирилган эди.