Ўзбекистон президенти Шавкат Мирзиёевнинг яқинда тадбиркорлар ва ишбилармонлар билан бўлиб ўтган учрашуви хорижий матбуот қизиқишини уйғотди. Хусусан, Туркиянинг Daily Sabah нашри учрашув тафсилотлари ҳақида мақола чоп этди. “Дарё” уни ўзбек тилига ўгирди.
Шавкат Мирзиёев ўз мурожаатида ўзбек ишбилармонлари турли можаролар туфайли логистика ва таъминот занжиридаги узилишлар, юқори глобал инфляция сабаб ҳамкор мамлакатлардаги валюта девалвацияси, молиявий ресурслар нархининг ошиши каби омиллар билан курашишга мажбур бўлганини таъкидлади.
“Камчиликларимиздан тўғри сабоқ олиб, олға интилсак, меҳнатсевар ва ташаббускор халқимиз ҳар қандай қийинчиликни, шубҳасиз, енгиб ўтишига ишонаман”, – дейди давлат раҳбари.
Унинг таъкидлашича, бундай мураккаб вазиятда муаммолар ҳақида бевосита бизнес вакилларининг ўзидан эшитиш ва биргаликда ечим топиш энг тўғри йўл бўлади.
Президент айтганидек, Ўзбекистон иқтисодиётида ўрта бизнес муҳим ўрин тутади, бироқ улар учун ҳозирги шароит етарли эмас. Шу боис кичик бизнесдан ўрта бизнесга ўтишга интилаётган тадбиркорларни қўллаб-қувватлаш бўйича янги ёндашувлар амалга оширилади.
Жорий йилда Ўзбекистон президенти тадбиркорлар билан очиқ мулоқот чоғида келиб тушган таклифлар асосида ишлаб чиқилган ва мамлакатда ишбилармонлик муҳитини яхшилашга қаратилган қатор ташаббусларни илгари сурди.
Тадбиркорликни қўллаб-қувватлаш жамғармаларининг фаолият усулларини сезиларли даражада қайта кўриб чиқиш тўғрисида қарор қабул қилинди.
Эндиликда Тадбиркорлик жамғармаси хизмат кўрсатиш, экологик ва энергияни тежаш лойиҳаларни молиявий қўллаб-қувватлаш, Саноатни ривожлантириш жамғармаси эса саноат лойиҳаларини назорат қилиш учун жавобгар бўлади. Маблағларни бошқариш учун чет эллик малакали менежерлар таклиф қилинади.
Бундан ташқари, жамғармалар бюджет маблағларидан ташқари мустақил инвестицияларни жалб қилиш ҳуқуқига эга.
Прогнозларга кўра, бундай маблағлар орқали жамғармалар келгуси йилда ўрта бизнесни молиялаштириш учун қўшимча 1 миллиард доллар тўплай олади. Ҳар бир ҳудудда камида учтадан янги саноат зоналари ташкил этилади. Саноат ипотека тизими жорий этилади, тадбиркорлар учун “тайёр корхоналар” кўринишидаги ишлаб чиқариш майдонлари барпо этилади. Саноат зоналарида ишлаб чиқариш йўлга қўйилиб, инвестиция мажбуриятлари бажарилгандан сўнг ер участкаларини хусусийлаштириш бошланади.
Ўтган етти йилда тадбиркорлик Ўзбекистон давлат сиёсатининг устувор йўналишига айланди, деб таъкидлади турк нашри. Ҳукумат томонидан имтиёзлар жорий этилиб, кичикдан то йириккача барча тоифадаги тадбиркорлик субъектларига кредитлар ажратилиб, ҳар томонлама қўллаб-қувватланмоқда.
Ўз навбатида, Ўзбекистонда бизнесни ривожлантиришнинг келгуси қадамларини белгилаб берувчи йиллик тадбирлардан бири — президентнинг тадбиркорлар билан очиқ мулоқотидир. Бу тадбирлар бизнес вакилларига ўз таклиф ва мулоҳазалари билан ўртоқлашиш имконини беради: уларнинг овози, шубҳасиз, эшитилади.
Кичик ва ўрта бизнес учун янги имкониятлар
Ўзбекистонда кичик ва ўрта корхоналарни қўллаб-қувватлаш ва ривожлантириш учун кенг қамровли экотизим яратилади. Шу мақсадда “Қишлоқ қурилиш банк” Business Development Bank’га айлантирилади.
Президентнинг сўзларига кўра, банкнинг фаолияти ҳам, ишлаш усуллари ҳам, жумладан, молиялаштириш механизмлари ҳам жиддий ўзгаришларга учрайди. Хусусан, ҳар бир ҳудуддаги банк ҳузурида кичик бизнес маркази ташкил этилади. Мазкур марказлар тадбиркорлар ташаббуси билан амалга оширилаётган бизнес лойиҳаларни ишлаб чиқишга хизмат қилади.
Улар янги лойиҳаларни амалга оширишга интилаётган тадбиркорларни мустақил равишда ўқитиш, зарур мутахассисларни жалб этиш, бухгалтерия ҳисоби, солиқ, аудит, маркетинг, юридик ва бошқа маслаҳат хизматларини таклиф этади. Марказлар янги корхоналарга замонавий технологияларни ўзлаштириш, ходимларнинг малакасини ошириш, маҳсулотларини самарали йўлга қўйишда ёрдам беради, деб маълум қилди Мирзиёев.
Президент ўз нутқида юқорида айтилган жамғармаларга мустақил равишда инвестицияларни жалб қилиш ҳуқуқи берилганини таъкидлади. Ушбу жамғармалар келгуси йилда ўрта бизнес учун қўшимча 1 миллиард доллар сармоя жалб этишни мақсад қилган.
Экспортни кенгайтиришнинг муҳим имкониятларидан бири Ўзбекистонга нуфузли хорижий брендларни жалб қилишдир. Президентнинг кўрсатмасидан сўнг ишчи гуруҳ Испания, Германия, Польша ва Туркиянинг йирик брендлари билан музокаралар олиб борди.
Маҳаллий корхоналарга сармоя киритиш ва буюртма беришни осонлаштириш учун уларни ташвишга соладиган учта муҳим масала ҳал қилинади: ишлаб чиқариш учун халқаро стандартлар, экологик ва сертификатлаштириш талаблари амалга оширилади. Тегишли меҳнат шароитлари яратилади, таниқли брендлар маҳсулотларини олиб кириш ва олиб чиқишда қулай божхона режими жорий этилади, деб мақоласини якунлаган Daily Sabah.
Изоҳ (0)