O‘zbekiston prezidenti Shavkat Mirziyoyevning yaqinda tadbirkorlar va ishbilarmonlar bilan bo‘lib o‘tgan uchrashuvi xorijiy matbuot qiziqishini uyg‘otdi. Xususan, Turkiyaning Daily Sabah nashri uchrashuv tafsilotlari haqida maqola chop etdi. “Daryo” uni o‘zbek tiliga o‘girdi.
Shavkat Mirziyoyev o‘z murojaatida o‘zbek ishbilarmonlari turli mojarolar tufayli logistika va ta’minot zanjiridagi uzilishlar, yuqori global inflyatsiya sabab hamkor mamlakatlardagi valyuta devalvatsiyasi, moliyaviy resurslar narxining oshishi kabi omillar bilan kurashishga majbur bo‘lganini ta’kidladi.
“Kamchiliklarimizdan to‘g‘ri saboq olib, olg‘a intilsak, mehnatsevar va tashabbuskor xalqimiz har qanday qiyinchilikni, shubhasiz, yengib o‘tishiga ishonaman”, – deydi davlat rahbari.
Uning ta’kidlashicha, bunday murakkab vaziyatda muammolar haqida bevosita biznes vakillarining o‘zidan eshitish va birgalikda yechim topish eng to‘g‘ri yo‘l bo‘ladi.
Prezident aytganidek, O‘zbekiston iqtisodiyotida o‘rta biznes muhim o‘rin tutadi, biroq ular uchun hozirgi sharoit yetarli emas. Shu bois kichik biznesdan o‘rta biznesga o‘tishga intilayotgan tadbirkorlarni qo‘llab-quvvatlash bo‘yicha yangi yondashuvlar amalga oshiriladi.
Joriy yilda O‘zbekiston prezidenti tadbirkorlar bilan ochiq muloqot chog‘ida kelib tushgan takliflar asosida ishlab chiqilgan va mamlakatda ishbilarmonlik muhitini yaxshilashga qaratilgan qator tashabbuslarni ilgari surdi.
Tadbirkorlikni qo‘llab-quvvatlash jamg‘armalarining faoliyat usullarini sezilarli darajada qayta ko‘rib chiqish to‘g‘risida qaror qabul qilindi.
Endilikda Tadbirkorlik jamg‘armasi xizmat ko‘rsatish, ekologik va energiyani tejash loyihalarni moliyaviy qo‘llab-quvvatlash, Sanoatni rivojlantirish jamg‘armasi esa sanoat loyihalarini nazorat qilish uchun javobgar bo‘ladi. Mablag‘larni boshqarish uchun chet ellik malakali menejerlar taklif qilinadi.
Bundan tashqari, jamg‘armalar budjet mablag‘laridan tashqari mustaqil investitsiyalarni jalb qilish huquqiga ega.
Prognozlarga ko‘ra, bunday mablag‘lar orqali jamg‘armalar kelgusi yilda o‘rta biznesni moliyalashtirish uchun qo‘shimcha 1 milliard dollar to‘play oladi. Har bir hududda kamida uchtadan yangi sanoat zonalari tashkil etiladi. Sanoat ipoteka tizimi joriy etiladi, tadbirkorlar uchun “tayyor korxonalar” ko‘rinishidagi ishlab chiqarish maydonlari barpo etiladi. Sanoat zonalarida ishlab chiqarish yo‘lga qo‘yilib, investitsiya majburiyatlari bajarilgandan so‘ng yer uchastkalarini xususiylashtirish boshlanadi.
O‘tgan yetti yilda tadbirkorlik O‘zbekiston davlat siyosatining ustuvor yo‘nalishiga aylandi, deb ta’kidladi turk nashri. Hukumat tomonidan imtiyozlar joriy etilib, kichikdan to yirikkacha barcha toifadagi tadbirkorlik subyektlariga kreditlar ajratilib, har tomonlama qo‘llab-quvvatlanmoqda.
O‘z navbatida, O‘zbekistonda biznesni rivojlantirishning kelgusi qadamlarini belgilab beruvchi yillik tadbirlardan biri — prezidentning tadbirkorlar bilan ochiq muloqotidir. Bu tadbirlar biznes vakillariga o‘z taklif va mulohazalari bilan o‘rtoqlashish imkonini beradi: ularning ovozi, shubhasiz, eshitiladi.
Kichik va o‘rta biznes uchun yangi imkoniyatlar
O‘zbekistonda kichik va o‘rta korxonalarni qo‘llab-quvvatlash va rivojlantirish uchun keng qamrovli ekotizim yaratiladi. Shu maqsadda “Qishloq qurilish bank” Business Development Bank’ga aylantiriladi.
Prezidentning so‘zlariga ko‘ra, bankning faoliyati ham, ishlash usullari ham, jumladan, moliyalashtirish mexanizmlari ham jiddiy o‘zgarishlarga uchraydi. Xususan, har bir hududdagi bank huzurida kichik biznes markazi tashkil etiladi. Mazkur markazlar tadbirkorlar tashabbusi bilan amalga oshirilayotgan biznes loyihalarni ishlab chiqishga xizmat qiladi.
Ular yangi loyihalarni amalga oshirishga intilayotgan tadbirkorlarni mustaqil ravishda o‘qitish, zarur mutaxassislarni jalb etish, buxgalteriya hisobi, soliq, audit, marketing, yuridik va boshqa maslahat xizmatlarini taklif etadi. Markazlar yangi korxonalarga zamonaviy texnologiyalarni o‘zlashtirish, xodimlarning malakasini oshirish, mahsulotlarini samarali yo‘lga qo‘yishda yordam beradi, deb ma’lum qildi Mirziyoyev.
Prezident o‘z nutqida yuqorida aytilgan jamg‘armalarga mustaqil ravishda investitsiyalarni jalb qilish huquqi berilganini ta’kidladi. Ushbu jamg‘armalar kelgusi yilda o‘rta biznes uchun qo‘shimcha 1 milliard dollar sarmoya jalb etishni maqsad qilgan.
Eksportni kengaytirishning muhim imkoniyatlaridan biri O‘zbekistonga nufuzli xorijiy brendlarni jalb qilishdir. Prezidentning ko‘rsatmasidan so‘ng ishchi guruh Ispaniya, Germaniya, Polsha va Turkiyaning yirik brendlari bilan muzokaralar olib bordi.
Mahalliy korxonalarga sarmoya kiritish va buyurtma berishni osonlashtirish uchun ularni tashvishga soladigan uchta muhim masala hal qilinadi: ishlab chiqarish uchun xalqaro standartlar, ekologik va sertifikatlashtirish talablari amalga oshiriladi. Tegishli mehnat sharoitlari yaratiladi, taniqli brendlar mahsulotlarini olib kirish va olib chiqishda qulay bojxona rejimi joriy etiladi, deb maqolasini yakunlagan Daily Sabah.
Izoh (0)