Мактабгача ва мактаб таълими вазири Ҳилола Умарованинг маълум қилишича, давлат гранти учун ажратилган ўринларнинг 77 фоизини жорий йилги мактаб битирувчилари эгаллаган.
Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан тақдим этилган маълумотларга кўра, 2023 йилда кириш имтиҳонларида иштирок этган (жами 888 511 нафар) абитуриентларнинг 303 560 нафари (31,5 фоиз) умумтаълим мактабларининг жорий ўқув йилги битирувчиларидир.
Ушбу битирувчиларнинг 95 497 нафари (25 фоизи) жорий тест синовларидан муваффақиятли ўтиб, маҳаллий ОТМлари талабаси бўлган. Қайд этилишича, олий таълим муассасаларига қабул қилинган битирувчилар бундан ҳам кўп, ҳар йили ўртача 10-15 фоиз (44 000 нафар) битирувчи нодавлат ва хорижий олий таълим муассасаси талабаси бўлмоқда. Шу боис айрим битирувчилар хусусий ва хорижий ОТМларга кирган ва тест синовларида иштирок этмаган.
Олий таълим муассасаларига кирган битирувчилар сони йилдан йилга ортиб бормоқда. Хусусан, 2021 йилга нисбатан олий таълим муассасаларига кирган битирувчилар сони 14019 нафарга, 2022 йилга нисбатан эса 9 628 нафарга ортган (2021 йил 81478 нафар, 2022 йилда 85 869 нафар битирувчи ОТМга кирган).
Битирувчиларнинг олий таълим қабул квотаси учун ажратилган давлат гранти ўринларини эгаллаш салмоғи ҳам йилдан йилга ортиб бормоқда. Жорий йилда давлат гранти учун 34930 та квота ажратилган бўлса, унинг 77 фоизини (26 884 нафар битирувчи) айнан мактаб битирувчилари эгаллаган.
Бу кўрсаткич ўтган йилга нисбатан 3,5 фоизга, яъни 3 537 тага кўп (2022 йилда 23 347 нафар мактаб битирувчилар грантга кирган бўлиб, улуши 73,5 фоиз бўлган). Таъкидланишича, битирувчиларнинг билим самарадорлиги ҳам ўтган йилга нисбатан яхшиланганлигини кўриш мумкин. Жорий йилда ўртача балл 77,1 ни ташкил этиб, 2021 йилга нисбатан қарийб 3 балга, 2022 йилга нисбатан эса 1 балга ортган (2021 йилда 74,2 балл, 2022 йилда 76,3 балл).
Максимал балнинг 75 фоизидан юқорисини тўплаб, ижобий натижа кўрсатган абитуриентларнинг 68 фоиз улуши жорий йилги битирувчиларга тўғри келмоқда. Бу йил 30640 нафар юқори натижа кўрсатган абитуриентларнинг 20873 нафари ҳам мактаб битирувчиларидир. Жорий йилда жами 888 511 нафар абитуриентдан 415 159 нафари (46,7 фоизи) 56.7 баллни ҳам тўплай олмаган бўлса, улар орасида мактаб битирувчилари 11,7 фоизни ташкил этмоқда. Бу кўрсаткич 2022 йилга нисбатан қарийб 4 минг нафарга камайган.
“Натижалар кутилаётган кўрсаткичлардан йироқ бўлиши мумкин. Бироқ охирги йилларни тенденциясини таҳлил қилар эканмиз, йилдан йилга битирувчилар қайд этаётган натижаларда ижобий динамика мавжудлигининг гувоҳи бўлишимиз мумкин.
Мактаб таълими сифатини ошириш бўйича амалга оширилиши лозим бўлган ишлар жуда кўп. Бунда фақатгина мактаб жамоаси ҳамда педагогларнинг меҳнати билан чекланмай, фарзандларимизнинг билимли бўлишида ота-оналарнинг ҳам ўрни муҳимлигини айтиб ўтишимиз лозим”, — дейди Ҳилола Умарова.
Изоҳ (0)