Самарқандда 49 киши ҳот-догдан заҳарланиши юзасидан расмий маълумот берилди

Самарқанд шаҳрида 49 киши тез овқатланиш кафесида тайёрланган таомдан заҳарланиб, юқумли касалликлар шифохонасига ётқизилгани ҳақида хабар берилди. Санитария-эпидемиология қўмитаси ахборот хизмати ҳолат юзасидан маълумот берди.

Унга кўра, 2023 йил 14—15 август кунлари Самарқанд шаҳри, Рудакий кўчасида жойлашган фастфуд таомларини тайёрлаш ва сотиш фаолияти билан шуғулланаётган “Бир зумда” номли савдо шохобчасида тайёрланган ҳот-догдан 49 нафар фуқаро заҳарланиб, “овқат токсикоинфекцияси” ташхиси билан вилоят юқумли касалликлар клиник шифохонасига ётқизилган.

21 август ҳолатига кўра, шифохонада даволанишда бўлган беморларнинг барчасига амалга оширилган тиббий муолажалардан сўнг аҳволи яхшилангани сабабли уйларига жавоб берилган. Ўрганиш жараёнида ҳот-дог тайёрлашда ишлатилган сабзи салати Самарқанд туман, “Боғи тилло” маҳалласида яшовчи фуқаро М.С. томонидан уй шароитида тайёрлангани аниқланган. Сабзи салатини тайёрлашда иштирок этган хонадон аъзолари М.С. ва А.У.дан иш анжомларидан тайёр сабзи салати ва ичимлик сувидан намуналар олиниб, Санепидқўмитанинг Самарқанд шаҳар бўлими лабораторияларига юборилган. 

Шунингдек, “Бир зумда” номли савдо шохобчасида ваколатли орган билан келишилган тартибда 2023 йил 18 август куни текшириш ўтказилди. Текшириш давомида савдо шохобчасида технологик эҳтиёжлар учун ишлатилаётган иш анжомлари маркировкаланмагани, идиш ювиш хонаси санитария қоида ва меъёрларига зид равишда ташкил этилгани ҳамда савдо шохобчасида хавфсизлиги кафолатланмаган, уй шароитида тайёрланган салатларнинг ишлатилишига йўл қўйилгани аниқланди.

Бу эса “Умумий овқатланиш корхоналарига қўйиладиган гигиеник талаблар тўғрисида”ги 0027-22-сонли СанҚваМни ҳамда “Аҳолининг санитария-эпидемиологик осойишталиги тўғрисида”ги қонуннинг  24-моддаси, “Озиқ-овқат маҳсулотларининг сифати ва хавфсизлиги тўғрисида”ги қонуннинг 14-моддаси талаблари бузилганини кўрсатади.

Аниқланган камчиликлар юзасидан “Бир зумда” номли савдо шохобчасининг иш фаолияти 18 августдан вақтинча тўхтатилган ва корхона раҳбари А.А.га маъмурий баённома расмийлаштирилган.