Ижтимоий тармоқларда ОТМлар томонидан талабалардан қонунчилик ҳужжатларига кўра талаб қилиш тақиқланган ҳужжатлар сўралаётгани ҳақида маълумотлар тарқалди. Адлия вазирлиги ортиқча ҳужжат талаб қилганлик учун жавобгарлик борлигини эслатди.
Қонунчиликка кўра, аҳолидан қуйидаги ҳужжатларни талаб қилиш бекор қилинган:
- шахсни тасдиқловчи ҳужжатнинг нусхасини;
- шахснинг белгиланган шаклдаги фотосуратини;
- жисмоний шахс томонидан ўрта махсус, профессионал (касб-ҳунар) таълим муассасаси ёки умумий ўрта таълим муассасаси (11-синф негизида) тугатилганини тасдиқловчи маълумотларни (ҳужжатларни);
- кам таъминланган оила ёки оила аъзоси сифатида рўйхатга олинганини тасдиқловчи маълумотларни (ҳужжатларни);
- солиқ тўловчи жисмоний шахсларнинг давлат солиқ хизмати органларида ҳисобга қўйилганини тасдиқловчи маълумотларни (СТИР);
- ОТМларга ўқишга кириш учун имтиёзга эга бўлган абитуриентларнинг имтиёз ҳуқуқини тасдиқловчи ҳужжат тўғрисида маълумотларни.
“Ушбу ҳужжат ва маълумотларнинг талаб қилиниши давлат хизматлари кўрсатиш соҳасидаги қонунчилик ҳужжатлари талабларини бузиш деб ҳисобланиб, уларни талаб этган давлат идоралари жавобгарликка тортилади”, — дея огоҳлантирди Адлия вазирлиги.
Шунингдек, ушбу ҳужжатларни талаб қилиш ҳолатлари кузатилса, Адлия вазирлиги ва ҳудудий адлия органларининг тегишли телефон рақамларига мурожаат қилиш мумкинлиги билдирилди.
Изоҳ (0)