Озарбайжоннинг Боку шаҳрида Озарбайжон—Ўзбекистон бизнес-форуми бўлиб ўтди. Бу ҳақда “Дарё” мухбири хабар берди.
Шавкат Мирзиёевнинг Озарбайжонга давлат ташрифи арафасида 21 август куни Боку шаҳрида икки мамлакатнинг тегишли вазирлик ва идоралар, шунингдек, 250 дан ортиқ етакчи компаниялари вакиллари иштирокида бизнес-форум бўлиб ўтмоқда. Тадбирга инвестициялар, саноат ва савдо вазири Лазиз Кудратов ва Озарбайжон иқтисодиёт вазири Микаил Жабборов ҳамраислик қилмоқда.
Спикерлар иштирокчиларга мурожаат қилар экан, икки давлат раҳбарларининг ишончли ва дўстона муносабатлари туфайли Ўзбекистон—Озарбайжон шерикчилиги мустаҳкамланиб бораётгани, ўзаро ҳамкорликнинг ривожланиши сифат жиҳатдан янги босқичга кўтарилганини таъкидлади.
Хусусан, мамлакатлар ўртасидаги товар айирбошлаш ҳажми 2022 йилда 6 баробарга, жорий йил бошидан эса яна 40 фоизга ошди. Икки давлат раҳбарлари томонидан бошқа чоралар билан бир қаторда фармацевтика ва нефть-кимё маҳсулотлари, пластмасса буюмлар, полимерлар ва тоғ-кон саноати маҳсулотларини ўзаро етказиб беришни кўпайтириш ҳисобига яқин йилларда бу кўрсаткични 1 миллиард долларга етказиш вазифаси қўйилгани таъкидланди. Саноат кооперацияси ҳамкорликнинг яна бир истиқболли йўналиши сифатида тилга олинди. Кейинги йилларда қўшма корхоналар сони тўрт баравар кўпайди. Бугунги кунда Ўзбекистонда Озарбайжон капитали иштирокидаги 200 дан ортиқ корхона фаолият юритмоқда.
Айни пайтда автомобиль ишлаб чиқаришни кенгайтириш, Озарбайжонда пахта-тўқимачилик ва ипакчилик кластерларини ташкил қилиш, Ўзбекистонда қурилиш материаллари ва заргарлик буюмларини ишлаб чиқариш каби бир қатор қўшма лойиҳаларни амалга ошириш жараёни бошлаб юборилган.
Шу билан бирга, энергетика, металлургия, шаҳарсозлик, фармацевтика, электротехника, қишлоқ хўжалиги ва озиқ-овқат саноати, шунингдек, нефть-газ саноати ҳамкорликнинг истиқболли йўналишлари сифатида белгиланди. Ўзбекистон—Озарбайжон инвестициявий компанияси кўмагида металл буюмлар, фармацевтика маҳсулотлари, маиший техника ва қурилиш материаллари ишлаб чиқарувчи қўшма корхоналар ташкил этиш бўйича аниқ таклифлар билдирилди.
Ўзбекистон томони мамлакатда ишбилармонлик муҳитини яхшилаш ва тадбиркорликни қўллаб-қувватлаш бўйича кўрилаётган чора-тадбирларни алоҳида таъкидлади. Мисол сифатида эркин бозор механизмларини жорий қилиш, соғлом рақобат ва хусусий мулк дахлсизлигини таъминлаш, лойиҳаларни ишлаб чиқишнинг кенг қамровли экотизимини яратиш, уларни молиялаштиришнинг янги механизмларини жорий этиш ҳамда ишбилармонлар ва инвесторлар учун энг қулай шарт-шароитларни яратишга қаратилган бошқа самарали дастурлар келтирилди.
Сўзга чиққанлар икки давлат тадбиркорларини фаолроқ ҳамкорлик қилишга чақирди. Шу нуқтаи назардан, бизнес-форум доирасида ташкил этилган B2B ва G2B учрашувлари алоқаларни ривожлантиришга катта қизиқиш борлигини намоён қилди. Улар доирасида иштирокчилар ўзлари амалга оширган лойиҳаларни тақдим этиш, ҳамкорликнинг истиқболли йўналишлари ва форматларини батафсил муҳокама қилиш, янги истиқболли лойиҳаларни ишлаб чиқиш учун ўзаро ташрифларни режалаштириш имконига эга бўлди.
Форум якунлари бўйича нефть-газ, кимё ва тоғ-кон саноатлари, фармацевтика маҳсулотлари ва маиший техникани ишлаб чиқариш соҳаларида йирик савдо шартномалари ва инвестиция битимлари имзоланди.
Изоҳ (0)