Хитойда ўн ёшли бола уйдан қочиб кетиб, полиция бўлимига борди. Болакай полиция ходимларидан уни меҳрибонлик уйига юборишларини илтимос қилган. Бунга болакайнинг онаси билан жанжаллашиб қолгани, уй вазифасини бажармагани учун танбеҳ эшитгани сабаб бўлган.
Бу ҳақда Хитой оммавий ахборот воситалари маълум қилган. Полиция бўлимидаги видеокузатув камераларидаги ёзувлар ижтимоий тармоқларда тарқалган.
“Онам ҳар куни уйга вазифамни бажармаганим учун менга танбеҳ берарди ва мен уйдан чиқиб кетардим. У мени ҳар куни ўқишга мажбур қилади. Мен болалар уйига боришни афзал кўраман”, — деган болакай полиция ходимига.
Полиция ходимлари болани тинчлантиришга ва ота-онаси билан алоқа қилиш учун маълумотларини беришга кўндиришга муваффақ бўлган. Болакайнинг онаси у билан жанжаллашиб қолганини тасдиқлаган, бироқ “ўғли шу сабабли уйдан қочиб кетишини ҳеч ўйламаганини” айтган.
Шундан сўнг полиция ходимлари болакайни отаси билан уйига жўнатган. Кузатув камералари видеолари Хитойдаги ижтимоий тармоқларда тарқалиб, баҳс-мунозараларга сабаб бўлди. Баъзи фойдаланувчилар болакайнинг “қулоқсиз” эканини ва дангаса экани ҳақида ёзган. Бошқалар эса бечора болакайни уйига қайтара олган полициячига қойил қолган.
Изоҳ (0)