Москвага 30 июлга ўтар кечаси учта дрон ҳужум қилди. Уларнинг иккитаси “Москва-Сити” бизнес марказидаги биноларга келиб тушган. Дронларнинг яна бири Москва вилоятининг Одинсово туманида уриб туширилгани айтилмоқда. Бу май бошидан бери Москвага қилинган тўртинчи дрон ҳужумдир. Бу ҳақда BBC хабар берди.
“Украина дронлари бугун тунда ҳужум қилди. Москва-Сити офисининг иккита биносидаги фасадга зарар етган. Қурбонлар ва жароҳатланганлар йўқ”, — дейди Москва мери Сергей Собянин.
Ҳужумда Россиянинг учта вазирлик идоралари ва турар-жой хонадонлари жойлашган 50 қаватли IQ-квартал биносининг бешинчи ва олтинчи қаватлари шикастланган.
Ҳаво зарбаси оқибати аск этган кадрлар ижтимоий тармоқларда эълон қилинган. Тасвирларда биноларнинг ойнаси синганини кўриш мумкин.
Баъзи маълумотларга кўра, ҳужум оқибатида бир-икки киши жароҳатланган, бироқ расмийлар бу маълумотни тасдиқламаган.
Маш телеграм-канали Москвага ҳужум қилган иккита дрондан биринчиси соат 03:20 да қулаб тушганини ёзмоқда. Москва вилоятининг Одинсово туманида ҳаво мудофаа тизими ишга тушган.
Тахминан соат 04:10 да иккинчи портлаш — Око-2 бизнес марказида содир бўлгани айтилган.
Россия Мудофаа вазирлиги муносабати
Вазирлик Москва вилоятида мудофаа тизимлари орқали битта Украина дрони ҳавода йўқ қилингани, “яна иккита дрон радиоэлектрон кураш воситалари билан бостирилгани ва бошқарувни йўқотиб, Москва-Сити ҳудудига қулаганини” айтди.
Украина дрон ҳужуми бўйича муносабат билдирмаган. Воқеа сабабли пойтахтнинг “Внуково” аэропорти учиш ва қўниш йўлаги қисқа муддатга ёпилган, Москва ва Москва вилояти ҳаво зонасида парвозлар тақиқланган.
Бундан ташқари, Москва шаҳри ҳудудида, Testoвская кўчасида транспорт ҳаракати тўсиб қўйилган.
Москвага тўртинчи дрон ҳужуми
Бу май бошидан бери Москвага қилинган тўртинчи ҳужумдир. Аввалги дрон ҳужуми 24 июль куни бўлганди. Ўшанда Москвадаги турар-жой бўлмаган бинолар зарар кўрган. Улардан бири Россия Мудофаа вазирлиги яқинида қулаган.
Ўшанда ҳам Россия Мудофаа вазирлиги дронлар радиоэлектрон кураш воситалари орқали “бостирилгани” ва ҳалокатга учраганини ҳам айтганди.
Май ойи охири ва июль бошида эса дронлар Россия пойтахтига яқинлашганда уриб туширилган.
Изоҳ (0)