АҚШ Дания ва Нидерландиянинг Украинага F-16 қирувчи самолётларини етказиб бериш ҳақидаги сўровларини маъқуллади. Бу ҳақда америкалик расмийлардан бирга ҳамда давлат котиби Энтони Блинкеннинг мактубига таяниб, Reuters хабар бермоқда.
Агентликнинг аниқлик киритишича, қирувчи самолётлар украиналик учувчиларни улар билан ишлашга тайёрлаш тугаганидан сўнг жўнатилиши мумкин.
“Ушбу мактуб билан мен АҚШ F-16 қирувчи самолётларини Украинага топширишни ҳам, украиналик учувчиларни малакали инструкторлар томонидан ўқитишни ҳам тўлиқ қўллаб-қувватлашини билдираман. Россиядан давом этаётган тажовуз ва суверенитети бузилиши фонида Украинанинг ўзини ҳимоя қила олиши муҳим”, — дейилади Блинкен мактубида.
Давлат котибининг сўзларига кўра, Дания ва Нидерландия сўровларининг маъқулланиши Украинага “учувчиларнинг биринчи партияси машғулотларни якунлаши биланоқ, ўзининг янги имкониятларидан тўлиқ фойдаланиш” имконини беради.
16 август куни Украина Қуролли кучлари Ҳарбий-ҳаво кучларининг расмий вакили Юрий Игнат Украина бу йил кузда ҳам, қишда ҳам F-16 қирувчиларини олишга муваффақ бўлмаслигини айтганди. Унинг таъкидлашича, нима бўлган тақдирда ҳам, украиналик учувчиларни F-16 да ўқитиш масаласи “олдинга силжиган”.
Июль ойида Politico Дания ва Нидерландия бошчилигидаги 11 давлатдан иборат коалиция украиналик учувчиларга F-16 да учишни ўргатишга тайёрлигини, бироқ АҚШнинг расмий рухсатисиз буни амалга ошира олмаслигини хабар қилди. 8 август куни Пентагон АҚШ президенти Жо Байден бошқа давлатлар вакилларига украиналик учувчиларни ўқитишга рухсат берганини маълум қилди.
Ҳарбий экспертларнинг Тhе Economist нашрига ёзган мақоласида F-16 қирувчи самолётлари Украина армиясига фронтда тезкор муваффақиятга эришишга ёрдам бермаслиги айтилди.
Washington Post газетасининг ёзишича, украиналик учувчиларни тайёрлаш 2024 йилнинг январь ойида бошланади, чунки бунга қадар улар Буюк Британияда тўрт ойлик инглиз тили курсларини ўташи керак. Жангчиларнинг учиш бўйича машғулотлари яна олти ой давом этади.
Изоҳ (0)