“Истанбулда 7 магнитудадан юқори зилзила бўлиши кутилмоқда” — сейсмолог

Туркиялик етакчи сейсмолог Нажи Герюр Истанбулда 7 ва ундан юқори магнитудали зилзила эҳтимоли 60 фоиздан ошишини айтди. Бу ҳақда Regnum хабар берди.

“Истанбулда 7 ва ундан юқори магнитудали янги зилзила башорат қилинган 30 йиллик давр ниҳоясига етмоқда. Биз олдин ҳам бир неча бор 2029 йилгача кучли зилзила кузатилишини айтгандик, унинг кучи 1999 йил 17 августдагидан қолишмайди. Зилзила содир бўлишининг эҳтимоллик даражаси камида 64 фоиз, Истанбул эса бундай зилзилага тайёр эмас”, — деди профессор.

Герюр Туркия фанлар академияси аъзоси. 2022 йил апрель ойида у 2023 йил февралда Қаҳрамонмараш вилоятида содир бўлган 7,7 ва 7,6 магнитудали зилзила эпицентрини башорат қилганди.

Аввалроқ турк сейсмологлари 7 ва ундан ортиқ магнитудали силкинишлар бўлса, Истанбулдаги 90 мингта бино зудлик билан қулаб тушиши, 260 мингтаси вайрон бўлиб, яшаш учун яроқсиз ҳолга келишини айтганди.

17 август куни Туркия Мармара денгизида содир бўлган даҳшатли зилзилани хотирлайди. 1999 йилнинг шу куни Анадолу ва Евросиё тектоник плиталарининг туташувида жойлашган Истанбул яқинида 7,6 магнитудали зилзила содир бўлган. Оқибатда 17,2 минг киши ҳалок бўлган, 45 минг киши жароҳат олган.