Латвия Давлат чегара хизмати Беларусь билан чегарани мустаҳкамлаш мақсадида 15 августдан бошлаб шошилинч қўшимча чегарачиларни сафарбар қилиши ҳақида баёнот берди.
“Чегарани қўриқловчи ҳарбий қисмлар ходимларга таътил беришни тўхтатди, шунингдек, таътилда бўлганларни ишга чақирди”, — дейилади баёнотда.
Қарор “Латвия—Беларусь давлат чегарасида гибрид таҳдид тез ўсиб бораётгани муносабати билан” қабул қилинган. Ҳарбий муассасанинг таъкидлашича, 14 август куни 96 киши чегарани ноқонуний кесиб ўтишга уринган (13 августда 76 киши). Чегара хизмати “ноқонуний муҳожирлар оқимини ташкил этишда” Беларусь ҳукумати фаол иштирок этаётганини даъво қилди.
Латвия чегарачилари миллий Қуролли кучлар ва мамлакат полициясидан қўшимча ёрдам сўраган. Чегара қўшинлари бошлиғи Гунтис Пуяцнинг ЛСМ’га айтишича, Қуролли кучлар қўшимча ресурс беришга рози бўлган. Латвия Қуролли кучлари чегарачиларга ноқонуний миграцияга уринишларни тўхтатишда ёрдам беришини тасдиқлади.
Эслатиб ўтамиз, Россияда Евгений Пригожиннинг исёнидан кейин “Вагнер” хусусий ҳарбий компанияси ёлланма аскарларининг бир қисми Беларусга кўчиб ўтганди. Бунга жавобан Польша расмийлари Беларусь билан чегарани ҳимоя қилишни кучайтирди. Латвия ҳамда Польшада, расмийларнинг айтишича, “Вагнер”га қўшилишга чақириқлар бўлган.
Изоҳ (0)