Доғистон пойтахти Махачқалъада юз берган портлаш қурбонларидан ҳозирча фақат етти нафарининг шахси аниқланди, деб хабар бермоқда Маsh Telegram канали.
Қайд этилишича, улар орасида икки бола бор: 5 ёшли қиз ва 10 ёшли ўғил бола.
Маsh маълумотига кўра, бир нафар Ўзбекистон фуқароси ҳалок бўлган. У 1990 йилда туғилган Н.Р. экани айтилди.
Ўзбекистон Ташқи ишлар вазирлиги бу борада ҳозирча расмий маълумот эълон қилгани йўқ.
Махачқалъада 15 августга ўтар кечаси ёнилғи қуйиш шохобчасида кучли портлаш ва ёнғин юз берди. Ҳодиса оқибатида камида 35 киши ҳалок бўлди.
Shot Telegram канали Россия ФВВдаги манбага таяниб ёзишича, портлаш тўлқини туфайли ёнаётган ёнилғи аланга ичида қолган автосервисни кўриш учун келган ва ундан 50 метр радиусда бўлган одамларга ёпирилган. Маsh Telegram канали маҳаллий аҳолига таяниб, портлаш оқибатида одамлар бўлган автобус бутунлай ёниб кетганини даъво қилмоқда.
Маsh’нинг ёзишича, ёнилғи қуйиш шохобчаси ҳудудида бирорта ҳам ўт ўчириш гидранти ишламаган, ёнғинни ўчириш учун сув қўшни ҳудудлардан олиб келинган, жабрланганлар маҳаллий аҳоли томонидан шифохоналарга етказилган.
Маҳаллий ҳокимият маълумотларига кўра, жабрланганларнинг бир қисми кейин бошқа тиббиёт муассасаларига ўтказилган. Фавқулодда вазиятлар вазирлиги аҳволи ўта оғир беморларни Москвага олиб бориш учун Махачқалъага махсус самолёт юборди.
Изоҳ (0)