Шаҳзода Матчонова аслида актриса эмас, дипломат бўлиши керак эди. Чунки унда ҳуқуқий билимлар билан бирга хориж тилларида сўзлаша олиш маҳорати ҳам бор. Аммо кичик тасодифлар ҳам инсон ҳаётини ўзгартириб юбориши ҳеч гап эмас. 8 август куни туғилган кунини нишонлаган актриса мисолида бунга яна бир карра ишонч ҳосил қиламиз.
“Актриса бўлишни истамаганман”
Шаҳзода Матчонова Ўзбекистон ва Қорақалпоғистон халқ артисти Байрам Матчоновнинг набираси бўлади. “Менинг жигит вақтим” номли қўшиғи билан мухлислар эътиборига тушган хонанда қорақалпоқ халқи орасида жуда машҳур. Актрисанинг онаси ҳам санъаткор. Аммо уларнинг ҳеч бири Тошкентда ижод қилишга интилишмаган.
— Мен актриса бўламан, деб хаёлимга ҳам келтирмаганман. Чунки болаликдан юрист ёки дипломат бўлишни орзу қилганман. Бу йўналишда таҳсил олиш учун кўп ўқиш, назарий билимларга эга бўлиш керак. Ўқиш учун Тошкентга келганман ва омадим келиб, талабаликка қабул қилинганман. Биринчи курсда ўқиётганимда курсдош дугоналарим билан Алишер Навоий номидаги опера ва балет театрига борганмиз. Ўша ерда тасодифан Зулфиқор Мусоқов билан танишиб қолганман ва у киши мени кастингга таклиф этган. Қизиқиб, “Ўзбекфильм”да ўтказилган кастингга борганман. Аммо мени ролга тасдиқлашмаган. “Ўзбек қизларига ўхшамайди”, деган гапдан қаттиқ ранжиганман. Бошқа қизлардан кам эмаслигимни исботлаш учун бошқа кастингларда иштирок этишга ҳаракат қилганман, — дейди актриса Шаҳзода Матчонова.
Уни кашф қилган “Апрель-май”
Илк муваффақиятсиз кастингдан кўп ўтмай уни Зебо Наврўзова ролга таклиф қилган. У Шоҳрухҳон билан бирга бош ролни ижро этган.
— Комила ролини ижро этишим қийин кечмаган. Балки режиссёр аёл киши бўлгани учун бир-биримизни тушуниб ишлагандирмиз. Фильмнинг баъзи саҳналари Москвада суратга олинганди. Ундан кейин “Қалбим ўғриси” фильмига таклиф қилишган. Мана шу фильмдан кейин томошабинлар кўпроқ танийдиган бўлишди. Менга фильм воқеалари билан бирга у ердаги либосларим ҳам жуда ёқади. Уни ҳар сафар кўрганимда илк ролимда тажрибасиз бўлганимни ҳис қиламан, — дейди актриса Шаҳзода Матчонова.
“Оила — ёпиқ ҳудуд”
Актриса шахсий ҳаёти хусусан, ота-онаси ва ака-укалари ҳақида гапиришни унчалик истамайди. Оммага фақат ёлғиз қиз фарзанд эканлиги ва ака-укаси борлигини маълум холос. Фақатгина бир интервьюсида укасининг бир гапидан қаттиқ ранжигани ҳақида айтиб ўтган.
— Болаликка бориб, укам “Сен хунук қизсан”, деган. Мана шу гап кўнглимга оғир ботган. Ўша пайтда хафа бўлганман, аммо кейин унутиб юборганман. “Оилангиз ҳақида нега гапирмайсиз?” деб кўп сўрашади. Менимча, оила ёпиқ ҳудуд, уни оммага ошкор этиш шарт эмас, — дейди актриса Шаҳзода Матчонова.
Шаҳзода Матчонова аёллик бахтини иккинчи турмушидан топди
Актриса Шаҳзода Матчонова 2016 йилнинг 25 ноябрь куни Омар исмли йигит билан оила қурганди. Ёшларнинг никоҳ оқшоми Тошкентдаги энг катта ресторанларнинг бирида бўлиб ўтган. Ҳатто, у сохта куёв эканлиги ҳақидаги гап-сўзлар ҳам тарқалганди. Шундан сўнг актриса шахсий ҳаёти ҳақида гапирмади, одамларнинг эътибори ҳам сусайди. Аммо актриса 2019 йили Instagram’даги stories’ларининг бирида “Ажрашганмисиз?” деган саволга “Ҳа” деб жавоб берди. Маълумотларга кўра, актриса иккинчи бор оила қурган ва Рания исмли қизалоқни дунёга келтирган.
Қандай эркакларни ёқтирмайди?
Мафтункор актриса қандай тоифадаги эркакларни ҳурмат қилмаслиги ҳақида ҳам айтиб ўтган.
— Эркак киши ваъда бердими, ҳар қандай шароитда ҳам унга амал қилиши керак. Ваъдасининг устидан чиқмадими, демак ундан ҳар қандай ишни кутиш мумкин. Ваъдасида турадиган ва қатъиятли эркакларни ҳурмат қиламан, — дейди актриса.
“Лифтга ёлғиз чиқишдан қўрқаман”
Шаҳзода Матчонованинг ҳам фобияси бор. У ёпиқ ҳудудлардан қўрқиши ҳақида айтиб ўтган.
— Масалан, ёлғиз лифтга чиқишдан қўрқаман. Худди нафасим қисаётгандек, ҳозир қандайдир кўнгилсизлик содир бўладигандек туюлади. Ундан кейин нотаниш хоналар ҳам менда қўрқув уйғотади, — дейди актриса.
Бўш вақтини қандай ўтказади?
Ҳар бир инсоннинг севимли машғулоти бўлади. Хўш актриса Шаҳзода Матчонова бўш вақтини қандай ўтказади?
— Шопинг қилиш жон-у дилим, аммо режасиз нимадир харид қилишни ёқтирмайман. Дўконларга албатта, аниқ мақсад билан бораман. Бундан ташқари китоблар ўқишни, рақс тушишни яхши кўраман. Интернетга ҳам асосан психологик мақолаларни ўқиш учун кираман, — дейди актриса.
Шуниси ҳам эътиборлики, актриса инглиз, рус ва турк тилларида яхши сўзлашади.
“Ошхонани ёмон кўраман”
Актриса ошхонани ёмон кўриши ва таом тайёрлашни унчалик ёқтирмаслигини яширмайди.
— Ҳақиқатан ҳам ошхонадан узоқ инсонман. Овқат қилишни аввалдан ёқтирмасдим, ҳозир ҳам худди шундай. Балки, бу таомларга унчалик ўч бўлмаганим учундир, — дейди актриса Шаҳзода Матчонова.
Изоҳ (0)