Shahzoda Matchonova aslida aktrisa emas, diplomat bo‘lishi kerak edi. Chunki unda huquqiy bilimlar bilan birga xorij tillarida so‘zlasha olish mahorati ham bor. Ammo kichik tasodiflar ham inson hayotini o‘zgartirib yuborishi hech gap emas. 8-avgust kuni tug‘ilgan kunini nishonlagan aktrisa misolida bunga yana bir karra ishonch hosil qilamiz.
“Aktrisa bo‘lishni istamaganman”
Shahzoda Matchonova O‘zbekiston va Qoraqalpog‘iston xalq artisti Bayram Matchonovning nabirasi bo‘ladi. “Mening jigit vaqtim” nomli qo‘shig‘i bilan muxlislar e’tiboriga tushgan xonanda qoraqalpoq xalqi orasida juda mashhur. Aktrisaning onasi ham san’atkor. Ammo ularning hech biri Toshkentda ijod qilishga intilishmagan.
— Men aktrisa bo‘laman, deb xayolimga ham keltirmaganman. Chunki bolalikdan yurist yoki diplomat bo‘lishni orzu qilganman. Bu yo‘nalishda tahsil olish uchun ko‘p o‘qish, nazariy bilimlarga ega bo‘lish kerak. O‘qish uchun Toshkentga kelganman va omadim kelib, talabalikka qabul qilinganman. Birinchi kursda o‘qiyotganimda kursdosh dugonalarim bilan Alisher Navoiy nomidagi opera va balet teatriga borganmiz. O‘sha yerda tasodifan Zulfiqor Musoqov bilan tanishib qolganman va u kishi meni kastingga taklif etgan. Qiziqib, “O‘zbekfilm”da o‘tkazilgan kastingga borganman. Ammo meni rolga tasdiqlashmagan. “O‘zbek qizlariga o‘xshamaydi”, degan gapdan qattiq ranjiganman. Boshqa qizlardan kam emasligimni isbotlash uchun boshqa kastinglarda ishtirok etishga harakat qilganman, — deydi aktrisa Shahzoda Matchonova.
Uni kashf qilgan “Aprel-may”
Ilk muvaffaqiyatsiz kastingdan ko‘p o‘tmay uni Zebo Navro‘zova rolga taklif qilgan. U Shohruxhon bilan birga bosh rolni ijro etgan.
— Komila rolini ijro etishim qiyin kechmagan. Balki rejissor ayol kishi bo‘lgani uchun bir-birimizni tushunib ishlagandirmiz. Filmning ba’zi sahnalari Moskvada suratga olingandi. Undan keyin “Qalbim o‘g‘risi” filmiga taklif qilishgan. Mana shu filmdan keyin tomoshabinlar ko‘proq taniydigan bo‘lishdi. Menga film voqealari bilan birga u yerdagi liboslarim ham juda yoqadi. Uni har safar ko‘rganimda ilk rolimda tajribasiz bo‘lganimni his qilaman, — deydi aktrisa Shahzoda Matchonova.
“Oila — yopiq hudud”
Aktrisa shaxsiy hayoti xususan, ota-onasi va aka-ukalari haqida gapirishni unchalik istamaydi. Ommaga faqat yolg‘iz qiz farzand ekanligi va aka-ukasi borligini ma’lum xolos. Faqatgina bir intervyusida ukasining bir gapidan qattiq ranjigani haqida aytib o‘tgan.
— Bolalikka borib, ukam “Sen xunuk qizsan”, degan. Mana shu gap ko‘nglimga og‘ir botgan. O‘sha paytda xafa bo‘lganman, ammo keyin unutib yuborganman. “Oilangiz haqida nega gapirmaysiz?” deb ko‘p so‘rashadi. Menimcha, oila yopiq hudud, uni ommaga oshkor etish shart emas, — deydi aktrisa Shahzoda Matchonova.
Shahzoda Matchonova ayollik baxtini ikkinchi turmushidan topdi
Aktrisa Shahzoda Matchonova 2016-yilning 25-noyabr kuni Omar ismli yigit bilan oila qurgandi. Yoshlarning nikoh oqshomi Toshkentdagi eng katta restoranlarning birida bo‘lib o‘tgan. Hatto, u soxta kuyov ekanligi haqidagi gap-so‘zlar ham tarqalgandi. Shundan so‘ng aktrisa shaxsiy hayoti haqida gapirmadi, odamlarning e’tibori ham susaydi. Ammo aktrisa 2019-yili Instagram’dagi stories’larining birida “Ajrashganmisiz?” degan savolga “Ha” deb javob berdi. Ma’lumotlarga ko‘ra, aktrisa ikkinchi bor oila qurgan va Raniya ismli qizaloqni dunyoga keltirgan.
Qanday erkaklarni yoqtirmaydi?
Maftunkor aktrisa qanday toifadagi erkaklarni hurmat qilmasligi haqida ham aytib o‘tgan.
— Erkak kishi va’da berdimi, har qanday sharoitda ham unga amal qilishi kerak. Va’dasining ustidan chiqmadimi, demak undan har qanday ishni kutish mumkin. Va’dasida turadigan va qat’iyatli erkaklarni hurmat qilaman, — deydi aktrisa.
“Liftga yolg‘iz chiqishdan qo‘rqaman”
Shahzoda Matchonovaning ham fobiyasi bor. U yopiq hududlardan qo‘rqishi haqida aytib o‘tgan.
— Masalan, yolg‘iz liftga chiqishdan qo‘rqaman. Xuddi nafasim qisayotgandek, hozir qandaydir ko‘ngilsizlik sodir bo‘ladigandek tuyuladi. Undan keyin notanish xonalar ham menda qo‘rquv uyg‘otadi, — deydi aktrisa.
Bo‘sh vaqtini qanday o‘tkazadi?
Har bir insonning sevimli mashg‘uloti bo‘ladi. Xo‘sh aktrisa Shahzoda Matchonova bo‘sh vaqtini qanday o‘tkazadi?
— Shoping qilish jon-u dilim, ammo rejasiz nimadir xarid qilishni yoqtirmayman. Do‘konlarga albatta, aniq maqsad bilan boraman. Bundan tashqari kitoblar o‘qishni, raqs tushishni yaxshi ko‘raman. Internetga ham asosan psixologik maqolalarni o‘qish uchun kiraman, — deydi aktrisa.
Shunisi ham e’tiborliki, aktrisa ingliz, rus va turk tillarida yaxshi so‘zlashadi.
“Oshxonani yomon ko‘raman”
Aktrisa oshxonani yomon ko‘rishi va taom tayyorlashni unchalik yoqtirmasligini yashirmaydi.
— Haqiqatan ham oshxonadan uzoq insonman. Ovqat qilishni avvaldan yoqtirmasdim, hozir ham xuddi shunday. Balki, bu taomlarga unchalik o‘ch bo‘lmaganim uchundir, — deydi aktrisa Shahzoda Matchonova.
Izoh (0)