Гладиаторлар жанги. Илон Маск Марк Цукербергга қарши жанг Римда бўлиб ўтишини маълум қилди

Миллиардер Илон Маскнинг Мета асосчиси Марк Цукербергга қарши жанги Римда бўлиб ўтади.

“Жанг Цукерберг билан биргаликдаги (UFC бунда иштирок этмайди) фондимиз ҳомийлигида бўлиб ўтади. Жонли эфир эса Х (аввалги номи Twitter) ва Мета’да бўлади. Томошабинлар замонавий эмас қадимги Рим муҳитидан баҳраманд бўлади. 

Италия бош вазири ва маданият вазири билан гаплашдим. Улар антик жойда жанг ўтказилишига рози бўлди”, — деб ёзди Илон Маск ижтимоий тармоқда. 

Эслатиб ўтамиз, Цукерберг Twitter’га (ҳозирда Х) рақобатчи Threads тармоғини ишга туширгач, Маск Мета асосчисига қарши жанг эълон қилди. Яъни 51 ёшли Маск ҳаваскорлар ўртасидаги бразилияча жиу-жицу турнирида ғолиб чиққан 39 ёшли Цукербергни “қафасдаги жанг”га чақирди. 

Цукерберг чақириқни қабул қилиб, жанг бўладиган манзилни жўнатишни сўраган. Маскнинг онаси Мей Маск Мета корпорацияси раҳбари Марк Цукерберг билан ўғли ўртасидаги жангни бекор қилганини айтган. У томонлар ўртасидаги баҳс гап орқали ҳал бўлишини илгари сурган.

Илон Маск уни жангга UFC собиқ чемпиони Ҳабиб Нурмагомедов тайёрлашини хоҳлаган. Бироқ Ҳабиб мазкур таклифни рад этган, сабаби эса очиқланмаган.