Gladiatorlar jangi. Ilon Mask Mark Sukerbergga qarshi jang Rimda bo‘lib o‘tishini ma’lum qildi

Milliarder Ilon Maskning Meta asoschisi Mark Sukerbergga qarshi jangi Rimda bo‘lib o‘tadi.

“Jang Sukerberg bilan birgalikdagi (UFC bunda ishtirok etmaydi) fondimiz homiyligida bo‘lib o‘tadi. Jonli efir esa X (avvalgi nomi Twitter) va Meta’da bo‘ladi. Tomoshabinlar zamonaviy emas qadimgi Rim muhitidan bahramand bo‘ladi. 

Italiya bosh vaziri va madaniyat vaziri bilan gaplashdim. Ular antik joyda jang o‘tkazilishiga rozi bo‘ldi”, — deb yozdi Ilon Mask ijtimoiy tarmoqda. 

Eslatib o‘tamiz, Sukerberg Twitter’ga (hozirda X) raqobatchi Threads tarmog‘ini ishga tushirgach, Mask Meta asoschisiga qarshi jang e’lon qildi. Ya’ni 51 yoshli Mask havaskorlar o‘rtasidagi braziliyacha jiu-jitsu turnirida g‘olib chiqqan 39 yoshli Sukerbergni “qafasdagi jang”ga chaqirdi. 

Sukerberg chaqiriqni qabul qilib, jang bo‘ladigan manzilni jo‘natishni so‘ragan. Maskning onasi Mey Mask Meta korporatsiyasi rahbari Mark Sukerberg bilan o‘g‘li o‘rtasidagi jangni bekor qilganini aytgan. U tomonlar o‘rtasidagi bahs gap orqali hal bo‘lishini ilgari surgan.

Ilon Mask uni jangga UFC sobiq chempioni Habib Nurmagomedov tayyorlashini xohlagan. Biroq Habib mazkur taklifni rad etgan, sababi esa ochiqlanmagan.