Эквадор президенти Гильермо Лассо президентликка номзод Фернандо Вильявисенсионинг отиб ўлдирилишини тергов қилишда ёрдам сўраб, АҚШ Федерал қидирув бюросига мурожаат қилди. Унинг айтишича, ФҚБ ходимлари тез орада мамлакатга келади.
Лассо халққа мурожаатида суиқасдни “сиёсий жиноят” ва сайловларни бузишга уриниш деб атади. 20 август куни Эквадорда муддатидан олдин президентлик ва парламент сайловлари бўлиб ўтади. Ўнг марказчи бўлган Вильявисенсио, оммавий сўровларга кўра, номзодлар рейтингида тўртинчи ёки бешинчи ўринларни эгаллаб турганди.
Эквадорда фавқулодда ҳолат эълон қилинди
9 август куни кечқурун Эквадор пойтахти Китода номаълум шахслар сайловолди ташвиқоти тадбиридан сўнг машинага ўтирган Вилявисенсионинг бошига уч марта ўқ узди. У тириклик белгиларисиз клиникага олиб кетилди, сўнг вафот этгани эълон қилинди.
Отишмада яна тўққиз киши жароҳат олган, ҳужумчи ҳам ўлдирилган.
Республикада 60 кунга фавқулодда ҳолат жорий этилди. Воқеадан сўнг президентликка номзодларнинг етти нафаридан беш нафари сайловолди ташвиқотини тўхтатганини эълон қилди. Бироқ сайлов санаси қолдирилгани йўқ.
Изоҳ (0)