Қирғизистонда 2027 йил 1 январдан полимер плёнкали пакетлар ва пластмасса буюмлар ишлаб чиқариш, сотиш ва бепул тарқатиш тақиқланади. Республика президенти Садир Жапаров тегишли қонунни имзолади, деб хабар бермоқда давлат раҳбари матбуот хизмати.
Қабул қилинган ҳужжат полимер материалларнинг Қирғизистон аҳолиси саломатлиги ва атроф-муҳитга зарарли таъсирини камайтиришга қаратилган. Шунингдек, полиэтилен пакетлар ва пластик буюмларни олиб кириш ҳам тақиқланмоқда.
Шу билан бирга, Қирғизистоннинг алоҳида муҳофаза этиладиган табиий ва биосфера ҳудудларида 2024 йил 1 январдан бошлаб полимер плёнкадан тайёрланган пластик буюмлар ва пакетлар ишлаб чиқаришга ҳам тақиқ жорий этилди. Экспорт учун ишлаб чиқарилган пакетлар, биологик парчаланадиган полимер материаллардан тайёрланган, тутқичлари бўлмаган ва маиший эҳтиёжлар учун сотиладиган пакетлар бундан мустасно.
Савдоси тақиқланган пластик маҳсулотлар рўйхатига қуйидагилар киритилган:
- бир марталик пластик идишларнинг барча турлари;
- бир марталик пластик озиқ-овқат қадоқлари;
- пластик шиша;
- пластик капсулалар;
- озиқ-овқат учун пластик сумкалар.
Қонун расмий эълон қилинган кундан бошлаб 15 кун ўтгач кучга киради.
2022 йил ёзида Ҳиндистонда 19 та тоифадаги бир марталик пластик буюмлар, шу жумладан, стаканлар ва найчалардан фойдаланиш тақиқланган эди.
2021 йилдан Европада бир марталик пластик идишлардан фойдаланиш қатъиян тақиқланган. 2019 йилда қабул қилинган тегишли қонунга кўра, Европа Иттифоқи давлатлари бундай маҳсулотларни бозордан олиб ташлаши ҳамда 2021 йил 3 июлга қадар уларни ишлаб чиқаришни тўхтатиши керак эди. 12 ой ичида мавжуд захираларни сотишга рухсат берилди, аммо шундан кейин тақиқ тўлиқ кучга кирди.
Изоҳ (0)