Ekvador prezidenti Gilyermo Lasso prezidentlikka nomzod Fernando Vilyavisensioning otib o‘ldirilishini tergov qilishda yordam so‘rab, AQSH Federal qidiruv byurosiga murojaat qildi. Uning aytishicha, FQB xodimlari tez orada mamlakatga keladi.
Lasso xalqqa murojaatida suiqasdni “siyosiy jinoyat” va saylovlarni buzishga urinish deb atadi. 20-avgust kuni Ekvadorda muddatidan oldin prezidentlik va parlament saylovlari bo‘lib o‘tadi. O‘ng markazchi bo‘lgan Vilyavisensio, ommaviy so‘rovlarga ko‘ra, nomzodlar reytingida to‘rtinchi yoki beshinchi o‘rinlarni egallab turgandi.
Ekvadorda favqulodda holat e’lon qilindi
9-avgust kuni kechqurun Ekvador poytaxti Kitoda noma’lum shaxslar saylovoldi tashviqoti tadbiridan so‘ng mashinaga o‘tirgan Vilyavisensioning boshiga uch marta o‘q uzdi. U tiriklik belgilarisiz klinikaga olib ketildi, so‘ng vafot etgani e’lon qilindi.
Otishmada yana to‘qqiz kishi jarohat olgan, hujumchi ham o‘ldirilgan.
Respublikada 60 kunga favqulodda holat joriy etildi. Voqeadan so‘ng prezidentlikka nomzodlarning yetti nafaridan besh nafari saylovoldi tashviqotini to‘xtatganini e’lon qildi. Biroq saylov sanasi qoldirilgani yo‘q.
Izoh (0)