Эквадорда президентликка номзод сайловолди митингидан кейин отиб ташланди

Эквадор президентлигига номзод Фернандо Вильявисенсио пойтахт Китодаги митингдан сўнг отиб ўлдирилди, деб ёзмоқда El Universo.

9 август куни кечқурун сайловолди митинги бўлиб ўтган Cолисео Т.V.Андерсон мактабида бир гуруҳ номаълум шахслар сиёсатчининг бошига уч марта ўқ узди. Вильявисенсио тириклик белгиларисиз клиникага олиб кетилди, сўнг вафот этгани эълон қилинди.

Гувоҳларнинг сўзларига кўра, ҳодиса жойида жуда кўп ўқ овозлари эшитилган, шундан сўнг оғир яраланган Вильявисенсио йиқилган. Отишма оқибатида жами саккизга яқин киши жароҳатланган, деб хабар беради манбалар.

Expreso нашрининг ёзишича, Вильявисенсио полиция томонидан ажратилган машинага ўтирган пайтда отиб ўлдирилган. У полиция ҳимоясига олинган номзодлардан бири эди. Бир ҳафта олдин сиёсатчи унга нисбатан турли таҳдидлар бўлаётгани ҳақида хабар берган.

Эквадор президенти Гильермо Лассо Вильявисенсио оиласига ҳамдардлик билдирди.

“Президентликка номзод Фернандо Вильявисенсионинг ўлдирилишидан ғазабландим ва ҳайратда қолдим. Унинг рафиқаси ва қизларига ҳамдардлик билдираман”, — деб ёзди у Twitter’да. Давлат раҳбари бу жиноятни жазосиз қолдирмасликка ваъда берди.

Лассо Миллий сайлов кенгаши раҳбари, бош прокурор, Миллий суд раҳбари ва бошқа ҳукумат амалдорлари билан фавқулодда йиғилиш ўтказди.

Қотилликда гумонланувчи қўлга олинди

Кейинроқ мамлакат Бош прокуратураси хабар берилишича, хавфсизлик кучлари Вильявисенсионинг ўлдирилишида гумонланган шахсни қўлга олган.

Гумонланувчи хавфсизлик ходимлари томонидан ярадор қилинган. Эркак қўлга олиниб, прокуратуранинг Оғир жиноятларга қарши курашиш бошқармасига олиб кетилди. Кейинчалик у олган жароҳатлари туфайли вафот этган.

Маълумот учун Вильявисенсио 59 ёшда эди, у Cоnstruye ҳаракатидан президентликка номзод бўлган. Сиёсатчи коррупцияга қарши курашган. У Чимборасо провинциясидаги Алауси кантонида туғилган, кейин унинг оиласи Китога кўчиб ўтган. 2021—2023 йилларда Вильявисенсио парламент назорати қўмитасига раислик қилган.

Май ойида Лассо Эквадор Миллий Ассамблеясини тарқатиб юборди ва муддатидан олдин сайловлар ўтказилишини эълон қилди. 20 август куни Эквадорда президент, вице-президент ва парламент сайланади.