Ўзбекистон бўйлаб Марказий Осиёдаги энг катта марафонлардан бири — “Янги Нафас” югуриш мусобақаси бўлиб ўтади 

Ўзбекистон бўйлаб Марказий Осиёдаги энг катта марафонлардан бири –“Янги Нафас” халқаро оммавий югуриш мусобақаси 3 сентябрь куни бўлиб ўтади.

3-сентябр куни Ўзбекистоннинг 16 та шаҳрида Ўзбекистон Республикаси мустақиллигининг 32 йиллигига бағишланган “Янги Нафас” оммавий югуриш мусобақаси бўлиб ўтади. Қорақалпоғистон Республикаси ҳамда барча вилоятларда турли ёшдаги ҳаваскор ва профессионал спортчилар ҳамда соғлом турмуш тарзи ихлосмандлари мамлакатимизнинг азиз байрами муносабати билан ташкил этиладиган кенг кўламли спорт ҳаракатига қўшилишлари мумкин бўлади.

Ўзбекистон енгил атлетика федерациясида пресс-анжуман ўтказилган бўлиб, унда келгуси оммавий югуриш мусобақасига тайёргарлик кўриш масалалари муҳокама қилинди. 

“Янги Нафас” югуриш мусобақасининг расмий шиори – “Бир ватанда, бир вақтда, бир масофага, бир мақсадда – бирга югурамиз!” мамлакатимизнинг 7 ёшдан 70 ёшгача бўлган ҳар бир фуқаросини бирлаштирган ҳолда, Ўзбекистон Республикаси давлат мустақиллигини нишонлаш жараёнидаги кайфият ва умумий муҳитни янада аниқроқ акс эттиради.

Таъкидлаш жоизки, анъанавий тарзда муҳим давлат саналари ва халқаро спорт тадбирларига бағишлаб ташкил этилаётган “Янги Нафас” оммавий югуриш мусобақалари Ўзбекистон Республикаси Вазирлар Маҳкамасининг “2019-2023 йилларда жисмоний тарбия ва оммавий спортни ривожлантириш концепцияси” тўғрисидаги қарори доирасида мамлакатда жисмоний тарбия ва оммавий спортни ривожлантириш ҳамда аҳолини фаол турмуш тарзига жалб этиш мақсадида қабул қилинган кенг кўламли давлат дастурининг ижросига яққол мисол бўла олади. 

“Янги Нафас” ижтимоий лойиҳасини ҳаётга тадбиқ этишнинг уч йили давомида Ўзбекистон енгил атлетика федерацияси ва “Ўзбекнефтгаз” акциядорлик жамияти билан ҳамкорликда 700 минг нафардан ортиқ одам оммавий югуриш мусобақасига қўшилиб, спорт тадбирларида фаол иштирок этишда давом этмоқдалар. 

3 км масофада 9 ёш ва ундан катта ёшдагилар учун спорт мусобақаларида иштирок этишга рухсат этилади. 10 км масофада истирок этиш ёши 14 ёш ва ундан катта. Барча шаҳарларда соат 6:30 да ягона старт берилади.

Иштирокчи тўпламларини бериш Ўзбекистон Республикаси Енгил атлетика федерацияси томонидан 1—2-сентябр кунлари соат 10:00 дан 19:00 га қадар қуйидаги манзилда амалга оширилади: I.Каримов кўчаси, 98-уй, мўлжал – “Пахтакор” стадиони.